मदिराको विज्ञापन गर्ने गाडीलाई ५१ हजार जरिवाना

२८ मंसिर, काठमाडौं । काठमाडौं महानगरपालिकाले मदिराको विज्ञापन सामग्री राख्ने सवारी साधनलाई जरिवाना तिराएको छ ।

अनुगमनको क्रममा काठमाडौं-१६ स्थित सोह्रखुट्टेमा बा १७ च ५१९४ नम्बरको गाडीमा सिल्भर वक मदिराको विज्ञापन सामग्री राखेर चलाएको पाइएपछि जरिवाना तिराइएको महानगर प्रहरीले जनाएको छ । महानगरका अनुसार सो गाडीलाई जरिवानाबापत ५१ हजार तिराइएको हो ।

महानगर प्रहरीका कार्यावहाक प्रमुख विष्णु जोशीले नियम विपरीत कुनै पनि माध्यमबाट विज्ञापन गर्न नपाइने बताए ।

‘महानगरका कर्मचारी, प्रहरी सबै जना अनुगमन मै हुन्छौं । मदिराको विज्ञापन कुनैपनि माध्यमबाट गर्न पाइँदैन, अन्य प्रतिबन्धित पदार्थको विज्ञापन गरेपनि हामी कारबाही गर्छौं,’ जोशीले अनलाइनखबरसँग भने ।