बागमती करिडोरका अतिक्रमित संरचनामा महानगरको डोजर

११ जेठ, काठमाडौं । काठमाडौं महानगरपालिकाले बागमती नदी करिडोरमा अतिक्रमण गरेर निर्माण गरेको भौतिक संरचना भत्काएको छ ।

महानगरको ३२ नम्बर वडाको तीनकुनेदेखि च्यासल तर्फ जाने करिडोरमा सार्वजनिक जग्गा र सडक अतिक्रमण गरेर निर्माण गरिएको संरचना डोजर चलाएर भत्काएको नगर प्रहरी उपरीक्षक दिनेश अर्यालले जानकारी दिए ।

‘हामीले सोही क्षेत्रको करिडोरमा ६–७ वटा संरचना भत्काइसकेका थियौं । एक हप्ता अगाडि माइकिङ गरेर हट्न पनि भनेका थियौं । आज ३ वटा पक्की र केही अस्थायी संरचनामा डोजर लगाएका हौं,’ अर्यालले अनलाइनखबरसँग भने ।

काठमाडौं महानगरपालिकाले अतिक्रमण गरेर निर्माण गरेको भौतिक संरचनाहरु भत्काउँदै आइरहेको छ ।