कुल ब्वाय र सिम्रन पन्तको दृश्य खिच्दै ‘होस्टेल ३’ को छायांकन सुरु

काठमाडौं । आइतबार बिहान ललितपुरको कार्यविनायक मन्दिरमा शुभसाइत पूजा गर्दै ‘होस्टेल ३’ को छायांकन सुरु भएको छ । फिल्मका प्रमुख कलाकार पारस बम (कुल ब्वाय) र सिम्रन पन्तले छोटो अभिनय गर्दै मुहूर्त-सट दिए ।

छायांकन भक्तपुरको बोडेबाट सुरु भएको छ । पहिलो चरणको छायांकन २५ दिनसम्म चल्ने र तिहारपछि अर्को चरणको छायांकन सुरु गरिने चलचित्रका निर्देशक सशान कँडेल (सन्तोष)ले बताए ।

‘होस्टेल’को तेस्रो श्रृंखलामा टिकटकमा चर्चित कन्टेन्ट क्रिएटर ‘कुल ब्वाय’ अर्थात् पारस बम, ‘भ्वाइस अफ नेपाल’को सिजन ४ का फाइनलिस्ट तथा भुटानी गायक रिहान गिरी, आशिष घिमिरे, पदम तामाङ, सिम्रन पन्त, हेना नगरकोटी, उमर खान, समा पराजुली, सन्तोष बानियाँको यसमा अभिनय छ ।

आर्यन सिग्देलले यसमा होस्टेलको हेरचाह गर्ने व्यक्ति वार्डेनको रोलमा अभिनय गर्नेछन् । परीक्षा लिम्बू केमियो रोलमा देखिनेछिन् ।

यो श्रृंखलाका अघिल्ला भागबाट अनमोल केसी, सलोन बस्नेत, प्रकृति श्रेष्ठ, नाजिर हुसेन, सुशील श्रेष्ठ, सुशील सिटौला, रोयदीप, प्रदीप चौधरी लगायतका कलाकारले फिल्ममा डेब्यु गरेका थिए ।

२०७० सालमा रिलिज भएको ‘होस्टेल’ र २०७२ सालमा आएको ’होस्टेल रिटर्न्स्’ दुवै फिल्मले घरेलु बक्स अफिसमा व्यावसायिक सफलता हासिल गरेका थिए । ‘होस्टेल ३’ फागुन १६ गते विश्वभर एकसाथ रिलिज हुने तयारीमा छ । सम्मान इन्टरटेनमेन्टले आरोन कन फिल्म्ससँगको सहकार्यमा फिल्म निर्माण गर्न लागेको हो ।