सुनिल बर्देवाको सम्झनामा एन्जल्स ब्याण्डले ल्यायो ‘कति छन्’

काठमाडौं । ‘द एन्जल्स ब्यान्ड’ले ‘कति छन्’ शीर्षकको नयाँ गीत सार्वजनिक गरेको छ । यस गीतमा ब्यान्डका लिड भोकलिस्ट राजु लामाले स्वर दिएका छन् ।

संगीत र शब्द सुनिल बर्देवाले तयार पारेका थिए । गीतले नेपाली संगीतप्रेमीमाझ बर्देवाको योगदानलाई ताजगी गराएको छ । गीतको भिडियोमा ब्यान्डका सदस्यको प्रस्तुति छ, जसमा गायक लामासँगै राजेश, बिकास र तासी छन् ।

गीत अमेरिकाको बाल्टिमोरस्थित आरएल डिजिटल रेकर्डिङ स्टुडियोमा रेकर्ड गरिएको हो । भिडियो निर्देशन र छायांकन संगमले गरेका छन् भने ग्राफिक्सको काम बालकृष्ण श्रेष्ठले गरेका छन् ।

सम्पादन अन्जय खड्का र बालकृष्ण श्रेष्ठले गरेका हुन् । यो गीत दिवंगत सुनिल बर्देवालाई श्रद्धाञ्जली स्वरूप समर्पित गरिएको गायाक लामाले बताए । बर्देवा नेपाली पप संगीतका चर्चित गायक, गीतकार, संगीत संयोजक र गिटारवादक थिए ।

उनका ‘गोरटो अनि उस्तै छ गली’ र ’बिहानीमा’ जस्ता गीत चर्चित छन् । सन् २०१६ मा ४४ वर्षको उमेरमा बर्देवाको निधन भएको थियो ।

द एन्जल्स ब्यान्ड सन् १९९० मा स्थापित पप ब्याण्ड हो । सन् १९९१ मा पहिलो एल्बम ’मौन जीवन’ सार्वजनिक गरेपछि, ब्यान्डले ‘द एन्जल्स २’, ’द एन्जल्स ३’, ’द एन्जल्स ४’ र ’बेस्ट अफ द एन्जल्स’ जस्ता एल्बम पनि ल्यायो ।