२०८१ माघ ८ गते १७:५९ 
८ माघ, काठमाडौं । एन्फा महिला राष्ट्रिय लिगअन्तर्गत सुपर लिगको अन्तिम खेलमा वालिङ नगरपालिकाले सान्त्वना जित हासिल गरेको छ । सुपर लिगमा जितविहिन रहेको वालिङले ३-१ को शानदार पुनरागमन जित निकालेको हो ।
सातदोबाटोस्थित एन्फा कम्प्लेक्समा बुधबार सम्पन्न खेलमा वालिङलाई जिताउन सुस्मा तामाङले ह्याट्रिक गरिन् । बागमतीका लागि सहारा लिम्बुले सुरूवाती गोल गरेकी थिइन् ।
४३औं मिनेटमा सहाराले गोल गर्दै बागमतीलाई अग्रता दिलाएको भएपनि दोस्रो हाफको ५६औं, ६८औं र ८५औं मिनेटमा सुस्माले गोल गर्दै ह्याट्रिक गर्दा वालिङको सान्त्वना जित पनि सम्भव भयो ।
बागमती यसअघि नै प्लेअफमा पुगिसकेको छ भने वालिङ बाहिरिने निश्चित भइसकेको थियो । बागमतीले ८ खेलबाट ४ अंक जोड्यो भने वालिङ ३ अंकमा सीमित रह्यो ।
बागमतीले अब प्लेअफअन्तर्गत इलिमिनेटरमा नेपाल पुलिस क्लबसँग खेल्ने छ भने पहिलो क्वालिफायरमा त्रिभुवन आर्मी र एपीएफ खेल्ने छन् ।
प्रतिक्रिया 4