रात्रि जीवन : बार, क्लब, पब र लाउन्जमा के छ भिन्नता ?

रात्रि जीवनमा रमाउनेहरु कहाँ जाने ? यसका केही विकल्प छन् । जस्तो कोही बारमा जान्छन्, कोही क्लब, कोही पब त कोही लाउन्ज । यी सबैमा खाने, पिउने, रमाउने नै हो । त्यसो भए किन नाममा एकरुपता छैन ? बार, क्लब, पब र लाउन्जबीच के भिन्नता छ ?

बार

बार यस्तो ठाउँ हो जहाँ रक्सी र अन्य मादक पेय पदार्थहरू मुख्य रूपमा सर्भ गरिन्छ । यो स्थान सामान्यतया साँझ खुल्छ र अबेर रात सम्म चल्छ । बारको वातावरण एकदम आरामदायी हुन्छ, जहाँ मानिस साथीहरूसँग वा एक्लै बसेर पेयको आनन्द लिन्छन् । बारमा लाइभ सङ्गीत वा डिजेको व्यवस्था पनि हुनसक्छ, तर यो मुख्य आकर्षण होइन । बारमा बस्ने व्यवस्था सहज हुन्छ, र यहाँका जानेहरू प्रायः पेय पदार्थहरूमा केन्द्रित हुन्छन् । यदि शान्त र आरामदायी वातावरणमा पेय पदार्थको आनन्द लिन चाहने हो भने, बार एक राम्रो विकल्प हुनसक्छ ।

क्लब

क्लबको वातावरण बार भन्दा धेरै फरक हुन्छ । क्लबमा विशेषत डान्स फ्लोर हुन्छ, जहाँ नृत्य, प्रकाश र सङ्गीतको संयोजन हुन्छ । खासगरी खाँदै, पिउँदै, नाच्दै रमाउनेहरूका लागि यो उपयुक्त गन्तव्य हुनसक्छ । क्लबमा डिजे वा लाइभ म्युजिकको व्यवस्था हुन्छ । प्रेम जोडी, युवाहरु प्राय क्लबमा मनोरञ्जन लिने गर्छन् ।

पब

पब, जसलाई पब्लिक हाउस पनि भनिन्छ । पबहरूमा सामान्यतया बियर र अन्य पेयहरू सर्भ गरिन्छ । साथै यहाँ अनौपचारिक, सहज वातावरण हुन्छ । पबमा साथीसँग बसेर गफगाफ गर्न र पेय पदार्थको आनन्द लिन सकिन्छ ।

त्यहाँ लाइभ म्युजिक वा कार्यक्रमहरू पनि हुनसक्छ, तर यो मुख्य आकर्षण होइन । पबको वातावरण बार भन्दा अलिबढी सामाजिक हुन्छ, यहाँ मानिसहरू जमघटका लागि आउने गर्छन् ।

लाउन्ज

लाउन्ज बार, पब र क्लब भन्दा अलि फरक हुन्छ । यहाँको वातावरण शान्त, आरामदायी र विलासी हुन्छ । लाउन्जमा पेय पदार्थका साथै हल्का खाजा र खाना पनि उपलब्ध हुन्छ । यहाँको सङ्गीत नरम र मधुर हुन्छ, जसले वातावरणलाई अझ रोमान्टिक बनाउँछ । मानिसहरू प्रायः आफ्नो पार्टनर वा नजिकका साथीहरूसँग समय बिताउन लाउन्ज जाने गर्छन् ।

यी सबमा के कुरा समान हुन्छ ?

यी सबै ठाउँका आ–आफ्नै नियम हुन्छन् । उदाहरणका लागि क्लब, बार वा पबहरू अबेर रातसम्म खुल्ला रहन्छन् । लाउन्ज र रेस्टुरेन्टहरू भने क्लब बार र पब भन्दा पहिले बन्द हुन्छन् । तर यी सबै ठाउँमा एउटा कुरा भने समान हुन्छ, यी सबमा ठाउँमा खाना भने अर्डर गर्न सकिन्छ ।