शिक्षा–उद्योग जोड्न परिसंघ र नेपाल विश्वविद्यालयबीच समझदारी

२४ वैशाख, काठमाडौं । शिक्षा र उद्योग जोड्ने मुख्य उद्देश्य सहित दुईपक्षीय सहकार्य गर्ने सम्बन्धमा नेपाल उद्योग परिसंघ र नेपाल विश्वविद्यालयबीच समझदारीपत्रमा हस्ताक्षर भएको छ ।

परिसंघमा बुधबार आयोजित समझदारीपत्र हस्ताक्षर कार्यक्रममा नेपाल विश्वविद्यालयका तर्फबाट रजिस्ट्रार डा. सूर्यराज आचार्य र परिसंघ तर्फबाट महानिर्देशक डा. घनश्याम ओझाले हस्ताक्षर गरे ।

कार्यक्रममा परिसंघ अध्यक्ष राजेशकुमार अग्रवालले सिपयुक्त जनशक्ति उत्पादन अहिलेको आवश्यकता रहेको बताए ।

उनले शैक्षिक योग्यता हुने तर सिपयुक्त सिकाइ बढाउन आवश्यक रहेकाले नयाँ अवधारणामा स्थापित नेपाल विश्वविद्यालयले सिपयुक्त जनशक्ति उत्पादनमा योगदान गर्ने विश्वास व्यक्त गरे ।

नेपाल विश्वविद्यालयमा अध्ययनरत विद्यार्थीलाई उद्योगसँग जोड्न परिसंघले काम गर्ने प्रतिबद्धता पनि उनले व्यक्त गरे । उनले नेपाल विश्वविद्यालयले हालको परम्परागत शैक्षिक कार्यक्रमलाई रूपान्तरण गर्ने विश्वास समेत व्यक्त गरे ।

नेपाल विश्वविद्यालयका कुलपति डा. बिन्दु लोहनीले विश्वविद्यालयका विद्यार्थीलाई प्रयोगात्मक सिकाइका लागि उद्योगहरूमा इन्टर्नसिप गराउन परिसंघले सहयोग गर्नुपर्ने बताए ।

सिपयुक्त शिक्षा प्रदान गर्ने गरी नेपाल विश्वविद्यालय अगाडि बढेको भन्दै उनले अहिलेको आवश्यकता पनि त्यही रहेको बताए ।

विश्वविद्यालयका उपकुलपति प्रा. डा. अर्जुन कार्कीले सिपयुक्त, उद्यमशीलता, नवीनतासँगै विद्यार्थीमा असल भावना विकास गराउने गरी कार्यक्रम ल्याइने बताए ।

विश्वविद्यालय नयाँ अवधारणा अनुसार अगाडि बढेकाले यसलाई सफल बनाउन सबैको सहयोग आवश्यक रहेको बताए । परिसंघका वरिष्ठ उपाध्यक्ष वीरेन्द्रराज पाण्डेले उद्योग अनुभव, पाठ्यक्रम विकास, नवीनता, अनुसन्धान लगायत क्षेत्रमा विश्वविद्यालयसँग सहकार्य गरिने बताए ।