नीति तथा कार्यक्रम पास गर्दा प्रतिनिधिसभामा ४४ र राष्ट्रिय सभामा ३ सांसद् अनुपस्थित

Quick Summary

AI-generated by OK AI. Editorially reviewed.

राष्ट्रिय सभामा ३ र प्रतिनिधिसभामा ४४ सांसद अनुपस्थित रहेर पनि नयाँ नीति तथा कार्यक्रम बहुमतले पारित भयो।
संसद् बैठकमा प्रधानमन्त्रीले नीति तथा कार्यक्रममाथि छलफलको जवाफ दिएपछि दुवै सदनले यसलाई बहुमतले स्वीकृति दिए।
अगामी दिनहरूमा विनियोजन विधेयक र बजेट सम्बन्धी छलफलहरू आयोजना हुनेछन्।

२८ वैशाख, काठमाडौं । आगामी आर्थिक वर्षको नीति तथा कार्यक्रम पास गर्दा प्रतिनिधिसभामा ४४ र राष्ट्रिय सभामा ३ सांसद अनुपस्थित रहेको पाइएको छ ।

संसद् सचिवालयका अनुसार ५९ सदस्यीय राष्ट्रिय सभामा नीति तथा कार्यक्रम पारितका लागि निर्णयार्थ प्रस्तुत ५६ जना सांसद् उपस्थित थिए ।

सत्तारुढ दल नेपाली कांग्रेसका किरण बाबु श्रेष्ठ अनुपस्थित रहेका थिए । प्रतिपक्षी दल माओवादी केन्द्रका राधेश्याम पासवान र राष्ट्रिय जनमोर्चाका सांसद तुलबहादुर विश्वकर्मा पनि अनुपस्थित थिए ।

निर्णयार्थ प्रस्तुत भएको नीति तथा कार्यक्रम बहुमतबाट पारित भएको छ ।

२७५ सदस्यीय प्रतिनिधि सभामा भने नीति तथा कार्यक्रम निर्णयार्थ प्रस्तुत गर्दा ४४ जना सांसद अनुपस्थित रहे । प्रतिनिधिसभाबाट पनि नीति तथा कार्यक्रम बहुमतले पारित भएको छ ।

यही वैशाख १९ गते राष्ट्रपति रामचन्द्र फौडेलले संघीय संसद्को संयुक्त बैठकमा नीति तथा कार्यत्रम प्रस्तुत गरेका थिए । त्यसपछि संसद्मा नीति तथा कार्यक्रममाथि छलफल भएको थियो ।

छलफलमा उठेका प्रश्नहरूको आइतबार प्रधानमन्त्री केपी शर्मा ओलीले जवाफ दिए । प्रधानमन्त्रीले जवाफ दिएपछि सदनमा नीति तथा कार्यक्रम निर्णयार्थ प्रस्तुत भएको हो । जो बहुमतले दुवै सभाबाट पारित भएको छ ।

यो सँगै, आइतबार नै उपप्रधानमन्त्री तथा अर्थमन्त्री विष्णुप्रसाद पौडेलले विनियोजन विधेयकका सिद्धान्त र प्राथमिकता सम्बन्धमा (कर प्रस्ताव बाहेक) माथि छलफल गरियोस् भन्ने प्रस्ताव प्रस्तुत गरेका छन् ।

यसमाथि प्रतिनिधिसभामा चार दिन छलफल हुनेछ । सभामुख देवराज घिमिरेकाअनुसार यही वैशाख ३० गते, ३१ गते, जेठ १ गते र जेठ २ गते प्रतिनिधिसभामा प्रि–बजेट छलफल हुनेछ ।