त्रिविको उपकुलपति सर्च कमिटी गठनको फाइल तयार

Quick Summary

AI-generated by OK AI. Editorially reviewed.

त्रिभुवन विश्वविद्यालयको उपकुलपति छनोटको प्रक्रिया सुरु भएको छ।
राजीनामा दिएपछि नयाँ उपकुलपति नियुक्तिका लागि सर्च कमिटी गठनको तयारी भइरहेको छ।
अहिले विश्वविद्यालय निमित्तको भरमा चलिरहेको छ र छिटो नयाँ उपकुलपति नियुक्त गर्न आवश्यक छ।

२८ वैशाख, काठमाडौं । त्रिभुवन विश्वविद्यालयको उपकुलपति छनोटको प्रक्रिया अघि बढेको छ।

गत १५ चैतमा उपकुलपतिबाट प्राडा केशरजंग बरालले राजीनामा दिएपछि त्रिविमा नयाँ उपकुलपतिको खोजी भएको हो ।

प्रधानमन्त्री एवं त्रिविका कुलपति केपी शर्मा ओलीले २८ चैतमा बरालको राजीनामा स्वीकृत गरेका थिए । राजीनामा स्वीकृत भएपछि नयाँ उपकुलपति नियुक्ति गर्न सर्च किमिटी गठन गर्न लागिएको हो ।

‘सर्च कमिटी गठनको प्रक्रिया अगाडि बढेको छ । सर्च कमिटी गठनको फाइल प्रधानमन्त्रीसामू पेस हुने क्रममा छ,’ प्रधानमन्त्री कार्यालयका सचिव राजकुमार श्रेष्ठले भने ।

यसबीच शिक्षा, विज्ञान तथा प्रविधिमन्त्री विद्या भट्टराईले राजीनामा दिइन् । त्यसैले पनि प्रक्रियामा ढिलाइ भएको अधिकारीहरू बताउँछन् । भट्टराईको राजीनामा पछि रघुजी पन्तलाई शिक्षामन्त्री नियुक्त भएका छन् । अब केही दिनमै सर्च कमिटी गठन गर्ने सरकारको तयारी छ ।

यो पनि पढ्नुहोस

‘राजीनामा दिने निर्णयको अन्तर्यमा एउटा होइन, दबाब र कारणका सिलसिला छन्’

२०८० मा उपकुलपति नियुक्ति प्रक्रियाको लागि खुला आह्वान गरिएको थियो । विज्ञ समिति गठन गरेर मेरिटको आधारमा उपकुलपतिको नियुक्तिका लागि तीन जनको नाम सिफारिस गरिएको थियो ।

बरालले राजीनामा दिएपछि त्रिवि नेतृत्वविहीन भएको हो । प्रधानमन्त्री ओलीले नीति तथा कार्यक्रम नै रोकेपछि र बारम्बार दबाब आएपछि उपकुलपतिबाट राजीनामा दिएको बरालले बताएका थिए । उपकुलपतिको ४ वर्षे कार्यकाल भए पनि नियुक्ति भएको १३ महिनामै बरालले राजीनामा दिएका थिए ।

यो पनि पढ्नुहोस

मेरा सिपाहीहरू पछि हटिसकेका थिए, एक्लै लड्न सकिनँ

बरालको राजीनामापछि शिक्षाध्यक्ष प्राडा खड्ग केसीलाई उपकुलपतिको जिम्मेवारी दिइएको छ । त्रिवि नियमअनुसार तीन महिना उपकुलपतिको जिम्मेवारी दिन सकिने प्रावधान छ । यही प्रावधानअनुसार केसीले उपकुलपतिको जिम्मेवारी पाएका हुन् ।

शिक्षाध्यक्ष केसीलाई उपकुलपतिको जिम्मेवारी दिएपछि मानविकी तथा सामाजिकशास्त्र संकायको डिन प्रा.डा. द्विविनन्द ढकाललाई शिक्षाध्यक्षको जिम्मेवारी दिइएको छ । त्रिवि हाल निमित्तको भरमा चलिरहेको छ ।

निमित्त उपकुलपतिले महत्वपूर्ण निर्णय गर्न नसक्ने भएकाले छिटो उपकुलपति नियुक्त हुनुपर्ने प्राज्ञहरू बताउँछन् ।

‘निमित्तले पनि काम गर्नुहोला तर लयमा ल्याउन उपकुलपति नै चाहिन्छ । महत्वपूर्ण निर्णय गर्न उपकुलपति नै चाहिन्छ । कतिपय निर्णय उपकुलपति आएपछि गरौंला भनिन्छ,’ पूर्वउपकुलपति केदारभक्त माथेमाले भने, ‘नेतृत्व गर्ने व्यक्तिको शून्यतामा काम अगाडि बढाउन गाह्रो हुन्छ । उपकुलपति नियुक्ति प्रक्रियामा ढिला गरिनु हुँदैन ।’