आईएमई ग्रुपको लगानीमा नवलपुरको मौलाकालीमा ‘इला होटल’ सञ्चालनमा आउँदै

Quick Summary

AI-generated by OK AI. Editorially reviewed.

इला होटल तथा रिसोर्टको औपचारिक उद्घाटन २९ वैशाखमा हुनेछ।
होटलमा ६५ वटा कोठा, ब्यांक्वेट, कन्फ्रेन्स हल, रेस्टुरेन्ट लगायत सुविधा उपलब्ध छन्।
आईएमई ग्रुपले देशभरि केबुलकार र पर्यटकीय पूर्वाधार निर्माण गर्दैछ।

२८ वैशाख, काठमाडौं । आईएमई ग्रुपको लगानीमा नवलपुर गैंडाकोट नगरपालिका–१ मौलाकालीमा इला होटल तथा रिसोर्ट औपचारिक रुपमा सञ्चालनमा आउँदै छ ।

२९ वैशाखमा औपचारिक उद्घाटनपछि होटल तथा रिसोर्ट सञ्चालनमा आउने भएको छ । मौलाकाली केबुलकारको माथिल्लो स्टेसनमा रहेको उक्त होटलमा सुइट तथा डिलक्स रुमसहित ६५ रुम, १ हजार जना क्षमताको ब्यांक्वेट तथा कन्फ्रेन्स हल, रेस्टुरेन्ट, स्विमिङ पुल, स्पा र जिम लगायत सुविधा उपलब्ध छन् ।

केबुलकार सहित इला होटल तथा रिसोर्टको अत्याधुनिक पर्यटकीय पूर्वाधारले नारायणी, देवघाट, त्रिवेणी लगायत देवभूमि, तपोभूमि सहित सम्पदाको ऐतिहासिक गरिमा र महिमा तथा यस क्षेत्रको प्रकृति पर्यटनलाई सबै नेपाली तथा विदेशी पर्यटक समक्ष पुर्‍याउन थप सघाउन पुग्ने विश्वास लिइएको छ ।

आईएमई ग्रुपले सातवटै प्रदेशमा केबुलकार, होटल तथा रिसोर्ट सहित पर्यटकीय पूर्वाधार निर्माण गरिहेको छ ।

हालसम्म तीन वटा प्रदेशमा केबुलकार निर्माण भई सञ्चालनमा आइसकेका छन् भने यस होटल सञ्चालनसँगै दुई वटामा होटल सहित आयोजना नै सञ्चालनमा आइसकेका छन् ।

लुम्बिनी केबुलकारको टप स्टेसन बसन्तपुरमा होटल निर्माण प्रक्रिया अघि बढेको छ भने सुदूरपश्चिमको कैलालीमा होटल, रिसोर्ट र केबुलकार निर्माणको काम एकसाथ अघि बढिरहेको छ ।

त्यहाँ अबको एक वर्षभित्र केबुलकार सञ्चालनमा आउने छ भने त्यसको केही समयपछि नै होटल र रिसोर्ट पनि सञ्चालनमा आउने छन् । त्यस्तै ताप्लेजुङ पाथीभरामा केबुलकार निर्माण प्रक्रियामा छ ।