ज्ञवाली बने अस्ट्रेलियामा ‘उदीयमान फिल्म निर्माता’, पाए ३५ हजार डलर

News Summary

Generated by OK AI. Editorially reviewed.

सविन ज्ञवालीलाई अष्ट्रेलियाको न्यू साउथ वेल्स सरकारले उदीयमान फिल्मकर्मीको रुपमा चयन गरेको छ।
उनले यस पुरस्कारसँगै ३५ हजार अस्ट्रेलियाली डलर प्राप्त गरेका छन् र यसले उनलाई फिल्म क्षेत्रमा थप सक्रियता र अवसरहरू प्रदान गरेको छ।
ज्ञवाली नेपाली र विदेशी भाषाका फिल्महरूमा काम गरिरहेका छन् र उनले नेपाली फिल्म ‘दोख’ का निर्माता समेत हुन्।

सिड्नी । अष्ट्रेलियाको न्यू साउथ वेल्स राज्य सरकारले नेपाली फिल्म निर्माता सविन ज्ञवालीलाई उदीयमान फिल्मकर्मीको रुपमा चयन गरेको छ ।

त्यहाँको स्क्रिन बोर्डको वेबसाइटअनुसार सन् २०२५ को ‘इमर्जिङ प्रड्युसर प्लेसमेन्ट प्रोग्राम’मा सविनसहित दुई अस्ट्रेलियाली फिल्ममेकरहरू अलेक्जेन्डर पेटरस र फ्रान्सिस्का व्रेथवेट उदीयमान फिल्मकर्मी घोषित भएका छन् ।

उपाधिसँगै ज्ञवालीले ३५ हजार अस्ट्रेलियाली डलर प्राप्त गरेका छन् । सिड्नीजस्तो प्रमुख सहर रहेको न्यू साउथ वेल्स राज्यमा बसोबास गर्दै आएका युवा फिल्ममेकरलाई स्क्रिन बोर्डले वर्षेनी पुरस्कृत गर्ने गर्छ ।

सम्बन्धित मेकरले फिल्म क्षेत्रमा पुर्‍याएको योगदानको मूल्यांकन गरेर यो पुरस्कार प्रदान गरिन्छ । ‘यो सम्मानले मलाई काममा सक्रियतापूर्वक लाग्न ऊर्जा दिएको छ’ ज्ञवालीले अनलाइनखबरसँग भने ।

डेढ दशकदेखी सिड्नीमा बस्दै आएका ज्ञवाली नेपाली र विदेशी भाषाका फिल्ममा सक्रिय छन् । उनी नेपाली फिल्म ‘दोख’का निर्माता हुन भने अष्ट्रेलियामा नै छायांकन गरिएका नेपाली फिल्म ऋतु, द ब्रेकअप, विनर, लप्पनछप्पन २ को लाइन प्रोड्युसर पनि हुन ।

यसबाहेक उनले अष्ट्रेलियामा छायांकन भएका चिनियाँ, अंग्रेजी र भारतीय फिल्ममा पनि काम गरेका छन् । अ लाईन रिटर्न्स र राइज लगायतका अस्ट्रेलियाली फिल्ममा पनि काम गरेका छन् ।

यो उपाधी हात पारेसँगै ज्ञवालीले राज्य अन्तर्गत रहेको स्क्रिन बोर्डसँग आबद्ध रहेर फिल्म निर्माण, वितरण, प्रदर्शन र निर्देशन विधामा काम गर्ने अवसर पाएका छन् ।