जलवायु संकटमा साझा समझदारीको सन्देशसहित सकियो सगरमाथा संवाद

सगरमाथा संवादको दोस्रो संस्करण सन् २०२७ मा हुने

जलवायु संकट समाधानका लागि साझा समझदारीको सन्देशसहितको घोषणापत्र जारी गर्दै सगरमाथा संवाद २०२५ सम्पन्न भएको छ ।

अनलाइनखबर

२०८२ जेठ ४ गते १४:५७

News Summary

Generated by OK AI. Editorially reviewed.

सगरमाथा संवाद २०२५ ले जलवायु संकट समाधानका लागि साझा समझदारीको घोषणापत्र जारी गर्‍यो।
परराष्ट्रमन्त्री राणाले जलवायु परिवर्तनका कारण उत्पन्न समस्याबारे आवाज उठाउन र अन्तरराष्ट्रिय मञ्चमा सुझाव प्रस्तुत गर्न आवश्यक रहेको बताए।
सगरमाथा संवादको दोस्रो संस्करण २०२७ मा आयोजना हुने र यसले विश्वलाई जलवायु परिवर्तनको प्रभाव र समाधानका उपायहरूबारे जानकारी गराउने उद्देश्य राख्दछ।

४ जेठ, काठमाडौं । जलवायु संकट समाधानका लागि साझा समझदारीको सन्देशसहितको घोषणापत्र जारी गर्दै सगरमाथा संवाद २०२५ सम्पन्न भएको छ ।

आइतबार परराष्ट्रमन्त्री डा. आरजु राणा देउवाले २५बुँदे ‘सगरमाथा कल फर एक्सन’ घोषणापत्र जारी भएको जानकारी गराउँदै सगरमाथा संवाद समापन गरेकी हुन् ।

सो क्रममा मन्त्री राणाले जलवायु परिवर्तनका कारण हिमालदेखि टापुसम्म उत्पन्न समस्याबारे आवाज उठाउन सगरमाथा संवाद सफल भएको बताइन् । संवादका निष्कर्षको कार्यान्वयन गर्दै उपलब्धि हासिल गर्न सामूहिक प्रयत्न आवश्यक रहेको उनले बताइन् ।

परराष्ट्रमन्त्री राणाले संवादमा छलफल भएका विषय र सुझावलाई विभिन्न अन्तरराष्ट्रिय मञ्चमा उठान गरिने उल्लेख गरिन् । जलवायु परिवर्तनका असर न्यूनीकरण गर्ने साझा प्रतिबद्धताका लागि सगरमाथा सम्वाद ऐतिहासिक फोरम हुन पुगेको उनको भनाइ छ ।

उनले सगरमाथा संवादको दोस्रो संस्करण सन् २०२७ मा हुने जानकारी दिइन् । जलवायु परिवर्तन र त्यसले पारेको प्रभावबारे विश्व समुदायलाई जानकारी गराउने तथा समाधानका उपाय खोज्ने उद्देश्यका साथ सरकारले पहिलो पटक सगरमाथा सम्वाद आयोजना गरेको हो । सम्मेलनमा एक सय ७५ विदेशी पाहुनासहित १२ देशबाट उच्च तहको प्रतिनिधिमण्डल सहभागी भएका थिए ।