धार्चेका योजना अलपत्र छोडेर ठेकेदार गायब

५ करोड ३८ लाख लागतको प्रशासनिक भवन ३ वर्षअघि नै निर्माण सम्पन्न भइसक्नुपर्ने थियो । तर हालसम्म ५० प्रतिशत पनि काम भएको छैन । पिलरका रडमा खिया लागेका छन् । करिब ५ सय बोरा सिमेन्ट प्रयोग गर्न नमिल्ने गरी बिग्रिएको छ । ठेकेदार गायब भएपछि भवन अलपत्र बनेको पालिकाले जनाएको छ ।

भवन निर्माणको जिम्मा विकोइ-हेमन्त जेभीले पाएको थियो । सम्झौताअनुसार ३ वर्षअघि अर्थात् २०७९ साल माघ महिनाभित्रै काम सम्पन्न गर्नुपर्ने थियो । त्यसयता दुई पटक म्याद थप भइसक्यो । थपिएको म्याद सकिँदा पनि कामको प्रगति शून्य छ । म्याद थप भएदेखि ठेकेदार गायब भएको पालिका अध्यक्ष लक्ष्मण गुरुङले बताए । फोन गर्दा सम्पर्कमै आउन नचाहने उनले बताए ।

‘नयाँ भवनबाट चाँडै सेवा दिने इच्छा थियो,’ उनले भने, ‘तर ठेकेदारको लापरबाहीका कारण समस्या भयो ।’ हिमपात र ढुवानी समस्याको बहाना बनाउँदै ठेकेदार पन्छिन खोजेको उनले बताए ।

‘एक त यहाँ हिउँ नै पर्दैन । अर्को, रात्रि बस सञ्चालन हुने ठाउँमा सामान ढुवानीको समस्या कसरी हुन्छ ? त्यो सबै ठेकेदारको बहाना मात्र हो ।’ ठेक्का तोड्ने तयारीमा रहे पनि खरिद ऐनको १४औं नियमावली संशोधनले समस्या बनाएको उनले जानकारी दिए ।

पालिकाले हाल भाडाको घरमा कार्यालय सञ्चालन गर्दै आएको छ । ठाउँ पर्याप्त नहुँदा कार्यसम्पादन र अभिलेख व्यवस्थापनमा समस्या भएको पालिकाका प्रमुख प्रशासकीय अधिकृत काजिमान सुनारले बताए । आफ्नै भवन बने आर्थिक व्ययभार कम पर्ने उनको भनाइ छ ।

‘अहिले वार्षिक करिब ४ लाख रुपैयाँ घरभाडा तिर्नुपर्छ । आफ्नै भवन बन्यो भने त्यति पैसा बच्ने थियो,’ उनले भने । सुनारका अनुसार अहिले म्याद थपका लागि भन्दै निर्माण कम्पनीले पालिकामा निवेदन पेस गरेको छ ।

यता, बेनिघाट-आरुघाट-लार्के सडकअन्तर्गत धार्चे गाउँपालिका-७ लापुबेसीस्थित नौलीखोलामाथिको मोटरेवल पुल निर्माणको काम पनि अलपत्र छ । ८ महिनाअघि सम्पन्न भइसक्नुपर्ने उक्त पुलको हालसम्म ५० प्रतिशतभन्दा बढी काम भएको छैन ।

४ करोड ३५ लाखमा पुल निर्माण गर्न सूर्योदय कन्स्ट्रक्सनसँग ठेक्का सम्झौता भएको पूर्वाधार विकास कार्यालय गोरखाले जनाएको छ । गत साउन महिनामै सम्पन्न हुनुपर्ने उक्त पुल अहिले अलपत्र अवस्थामा छ । आउँदो असारसम्मका लागि कार्यालयले म्याद थप गरेको छ । तर अझै काम सुरु भएको छैन । काममा ठेकेदारको चरम लापरबाही देखिएको कार्यालयका इन्जिनियर मोहन श्रेष्ठले बताए । गाडी गुड्ने वैकल्पिक बाटो नहुँदा पनि काममा ढिलाइ भएको उनले जानकारी दिए ।

झरना नजिकै कुल ३५ मिटर लम्बाइको सिसाको पुल बन्नेछ । झरना हेर्न आउने पर्यटकले उक्त पुल चढेर मजा लिनसक्ने पालिका उपाध्यक्ष सुनिला गुरुङ बताउँछिन् । पर्यटन प्रवर्द्धनमा यसले सहयोग पुग्ने उनको अपेक्षा छ ।

‘नौली झरना धार्चेको पर्यटकीय स्थलमध्ये एक हो,’ उनले भनिन्, ‘त्यहाँ आएका पर्यटकलाई भुलाउन र थप आकर्षित गर्न पुल बनाउन लागेका हौं ।’ तर समय गुज्रिन लाग्दा समेत ठेकेदारले काम सुरु नगरेको उनको गुनासो छ ।

यता, पालिकाको भिसी थमन मार्ग (माछीखोलादेखि सिङ्लासम्मको सडक) स्तरोन्नतिको काम पनि विगत एक महिनादेखि ठप्प छ । अलपत्र पारेर ठेकेदार हिँडेपछि काम रोकिएको हो । सडक स्तरोन्नतिका लागि चैत २०८० मा विष्णु साङ्देन एचएसडब्लू जेभीसँग ठेक्का सम्झौता भएको पालिकाका प्राविधिक यादवले बताए । उनका अनुसार आउँदो चैत महिनामा काम सक्नुपर्छ । तर हालसम्म कामको प्रगति १८ प्रतिशत मात्र छ ।

संघको ४ करोड २४ लाख रुपैयाँ समपूरक बजेटबाट उक्त सडक स्तरोन्नति गर्न लागिएको हो । कुल ४.५ किलोमिटर दुरीको उक्त खण्डमा केही भाग नयाँ ट्र्याक खोल्ने र बाँकी स्तरोन्नति गरिने बताइएको छ । यस काममा पनि ठेकेदारको लापरबाही देखिएको छ ।