कसैले चाहँदैमा सरकार ढल्दैन : एमाले महासचिव पोखरेल

नेकपा एमालेका महासचिव शंकर पोखरेल ।

News Summary

Generated by OK AI. Editorially reviewed.

नेकपा एमालेका महासचिव शंकर पोखरेल भन्छन्- सरकार ढल्ने हल्ला निराधार हो ।
एमाले–कांग्रेसको वर्तमान गठबन्धन आगामी चुनावसम्म कायम रहने उनको भनाइ छ ।
उनले कुनै दलसँग सरकार बन्न आवश्यक बहुमत नहुँदा गठबन्धन बाध्यता बनेकाे बताएका छन् ।

७ जेठ, काठमाडौं । नेकपा एमालेका महासचिव शंकर पोखरेलले सरकार ढल्ने हल्ला निराधार रहेको बताएका छन् ।

प्रेस चौतारी दाङ शाखले बुधबार गरेको पत्रकार सम्मेलनमा पोखरेलले एमाले–कांग्रेसको वर्तमान सत्तागठबन्धन आगामी आमनिर्वाचनसम्म कायम रहने बताएका हुन् ।

‘सत्तासाझेदार दलबीच गम्भीर असमझदारी नहुँदासम्म यो सरकार ढल्दैन । कसैले सरकार ढल्ने कामना नगर्दा हुन्छ,’ महासचिव पोखरेलले भने, ‘नेकपा एमाले र नेपाली कांग्रेसबीच अहिले कुनै असमझदारी छैन । त्यसैले यो गठबन्धन २०८४ को चुनावसम्म नै जान्छ ।’

प्रतिनिधिसभाका पहिलो र दोस्रो ठूलो दल मिलेर सरकार बनाउनु पर्ने बाध्यता सदनको अंकगणितको कारण उत्पन्न भएको उनको भनाइ छ । ‘कसैको बहुमत नभएकाले दलहरूबीच गठबन्धन गर्नु पर्ने बाध्यता नै हो,’ उनले थपे, ‘यस्तो बेलाको सरकार एक दलको नीतिमा आधारित हुँदैन । सामूहिक नीति र भावनाअनुसार चल्छ । अहिले त्यही भइरहेको छ ।’