भिजिट भिसामा गृहमन्त्रीको संलग्नताका यथेष्ट प्रमाण संकलन गरेका छौं : रास्वपा

News Summary

Generated by OK AI. Editorially reviewed.

रास्वपाले गृहमन्त्री रमेश लेखकको भिजिट भिसा प्रकरणमा संलग्नता भएको प्रमाण संकलन गरेको दाबी गरेको छ।
कार्यबाहक प्रवक्ता मनीष झाले आगामी संसद् बैठकमा प्रमाणहरू प्रस्तुत गर्ने जानकारी दिए।
प्रधानमन्त्री केपी शर्मा ओलीले नै सम्बोधन नगरी बैठक सञ्चालन गर्न नहुने उनले बताएका छन्।

१५ जेठ, काठमाडौं । राष्ट्रिय स्वतन्त्र पार्टी (रास्वपा) ले भिजिट भिसा प्रकरणमा गृहमन्त्री रमेश लेखक संलग्नता रहेको यथेष्ट प्रमाण आफूहरूसँग रहेको दाबी गरेको छ ।

साथै, पार्टीका कार्यबाहक प्रवक्ता मनीष झाले गृहमन्त्रीविरुद्धका प्रमाणहरू आगामी संसद् बैठकमा प्रस्तुत गर्ने पनि जानकारी गराएका छन् ।

बिहीबार संघीय संसद् भवन परिसरमा सञ्चारकर्मीसँग कुराकानी गर्दै उनले यस्तो बताएका हुन् ।

‘गृहमन्त्रीज्यूको संलग्नताका यथष्ट प्रमाण संकलन गरेका छौं । जुन आगामी बैठकमा प्रस्तुत गर्नेछौं,’ उनले भने ।

उनले राजनीतिक सुझबुझका साथ आजको बैठक सरल रुपमा चल्न दिएको पनि बताए । यद्यपि प्रधानमन्त्री केपी शर्मा ओलीले नै सम्बोधन नगरी आगामी बैठकहरू सञ्चालन गर्न नदिने झाको भनाइ छ ।

‘आजको बैठक सरल रुपमा जान दियौं । संवैधानिक प्रक्रियाप्रति राजनीतिक सुझबुझका साथ बैठक चल्न दिनु उपयुक्त हुन्छ । आज संवैधानिक प्रक्रियालाई व्यवधान गर्न हामी चाहँदैन थियौं,’ उनले भने, ‘राजनीतिक रुपमा हामीले एउटा सुझबुझ देखायौं । आगामी बैठकदेखि सामान्य रुपमा प्रस्तुत हुन नहुने निष्कर्षमा छौं ।’