पर्यटन बोर्डले सचिव मैनालीलाई गर्‍यो स्वागत, नवनियुक्त सदस्यको शपथ

News Summary

Generated by OK AI. Editorially reviewed.

नेपाल पर्यटन बोर्डले सचिव हरिप्रसाद मैनालीलाई स्वागत गरी नयाँ सदस्यहरूको पद तथा गोपनीयता शपथ गराएको छ।
मैनालीले पर्यटन क्षेत्रको दिगो र समुन्नत विकासमा सहकार्य र रणनीति अपनाउने बताए।

२० जेठ, काठमाडौं । नेपाल पर्यटन बोर्डले संस्कृति, पर्यटन तथा नागरिक उड्डयन मन्त्रालयका सचिव हरिप्रसाद मैनालीको स्वागत गरेको छ ।

स्वास्थ्य तथा जनसंख्या मन्त्रालयबाट सरुवा भएर आएका सचिव मैनालीको मंगलबार बोर्डमा एक कार्यक्रमबीच स्वागत गरिएको हो । बोर्ड अध्यक्ष समेत रहेका मैनालीले नवनियुक्त सदस्य नरेन्द्रदेव भट्ट र कुमारमणि थपलियालाई पद तथा गोपनीयताको शपथ समेत गराए ।

वरिष्ठ पर्यटन व्यवसायी तथा लक्जरी एडभेन्चर पर्यटनका अगुवा भट्ट र नेपाल एसोसिएसन अफ टुर एन्ड ट्राभल एजेन्ट्स (नाट्टा) का अध्यक्ष थपलियाको पर्यटन क्षेत्रमा नवीन सोच, अनुभव र ऊर्जा थपिएको अपेक्षा गरेको बोर्डका प्रमुख कार्यकारी अधिकृत (सीईओ) दीपकराज जोशीले बताए ।

कार्यक्रममा सीईओ जोशीले बोर्डको हालका गतिविधि, बोर्डले अख्तियार गरेका रणनीति तथा आगामी योजना प्रस्तुत गर्दै नयाँ नेतृत्वसँग सहकार्य गरी पर्यटन क्षेत्रको दिगो र समुन्नत विकासमा केन्द्रित हुने बताए ।

‘सचिव मैनालीको मार्गदर्शन र दुई नवनियुक्त सदस्यहरूको विविध अनुभवले बोर्डलाई राष्ट्रिय तथा अन्तर्राष्ट्रिय साझेदारी निर्माणमा सशक्त बनाउने छ । हामी सहकार्यमा आधारित परिवर्तन ल्याउने योजनामा छौं,’ उनले भने ।

कार्यक्रममा सचिव मैनालीले पर्यटन बोर्डका गतिविधिबारे प्रत्यक्ष जानकारी लिन पाउँदा खुसी लागेको बताए ।

‘नेपालको समृद्धिको आधार पर्यटन हो । यसले रोजगारी सिर्जना गर्छ, आय आर्जन गर्छ, राष्ट्रिय पहिचान विश्वमा फैलाउँछ,’ उनले भने, ‘मैले नीतिगत सहजीकरण गर्नेछु, समस्या समाधानमा साथ दिनेछु । हामी सधैंभरि यस्ता जिम्मेवारीमा रहिरहन सक्दैनौं, तर यस कार्यकालमा गरिने कामले भविष्यमा आत्मसन्तुष्टि मिलोस् र राष्ट्रको पर्यटनमा योगदान पुगोस् भन्ने मेरो चाहना हो ।’