नेपाली फिल्मको भीपीसी शुल्क २५ प्रतिशत घटाउने निर्माता संघ र डीसीएनको निर्णय

News Summary

Generated by OK AI. Editorially reviewed.

निर्माता संघ र डिजिटल सिनेमा नेपालबीच भीपीसी शुल्क २५ प्रतिशत घटाउने सहमति भयो।
यो निर्णय साउन मसान्तदेखि घरेलु चलचित्रको लागि लागू हुनेछ।
निर्माताले लामो समयदेखि माग गर्दै आएको यो निर्णयले वार्षिक ५० लाखभन्दा बढी मुनाफा हुने अध्यक्ष खड्काले बताए।

काठमाडौं । चलचित्र निर्माता संघ र डिजिटल सिनेमा नेपाल (डीसीएन)बीच बहुचर्चित भीपीसी (भर्चुअल प्रिन्ट कस्ट)को शुल्कमा २५ प्रतिशत घटाउने सहमति भएको छ ।

केडीएम चार्ज समेत भनिने यो प्रणालीको शुल्कमा कटौती गर्नेबारे बुधबार निर्माता संघ र डीसीएनबीच वार्ता भएको थियो । साउन मसान्तदेखि लागू हुने गरि केडीएम चार्ज २५ प्रतिशत घटाउने सहमति पत्रमा निर्माता संघका सबै पदाधिकारी र डीसीएन प्रमुख अशोक शर्माले हस्ताक्षर गरेका छन् ।

यो निर्णय घरेलु चलचित्रको हकमा मात्र लागू हुनेछ । ‘आजको दिन नेपाली चलचित्र निर्माताको लागि ऐतिहासिक दिन हो’ निर्माता संघका अध्यक्ष नवल खड्काले अनलाइनखबरसँग भने, ‘निर्माताले लामो समयदेखि उठाउँदै आएको माग आज पुरा भएको छ ।’

यो निर्णयपछि निर्मातालाई वार्षिक ५० लाखभन्दा धेरै रकम मुनाफा हुने अध्यक्ष खड्काले बताए । शुल्क घटाउन निर्माता संघले उदय सुब्बाको संयोजकत्वमा गठन गरेको वार्ता कार्यदलले सक्रिय भूमिका खेलेको थियो ।

कार्यदल सदस्यमा खगेन्द्र लामिछाने, दीपेन्द्र के खनाल, दीपकराज गिरी, निश्चल बस्नेत छन् । यसअघि निर्माता संघ र प्रदर्शक संस्थाबीच हलको राजस्व बाँडफाँटमा ५०-५० प्रतिशत रकम बाँड्ने सहमति लागू भएको थियो ।

‘फिफ्टी फिफ्टीको नियम लागू हुँदा पूर्णबहादुरको सारंगी फिल्मले ३ करोडभन्दा धेरै फाइदा लियो’ अध्यक्ष खड्काले भने, ‘निर्माता संघ निर्माताको सहजीकरणमा कटिबद्ध छ ।’