फेरिए सैनिक प्रवक्ता, केसीलाई पूर्वी पृतनाको जिम्मा

News Summary

Generated by OK AI. Editorially reviewed.

नेपाली सेनाका प्रवक्ता गौरवकुमार केसीलाई पूर्वी पृतनाको निमित्त प्रमुखको जिम्मेवारी दिइएको छ।
सैनिक सूचना तथा जनसम्पर्क निर्देशनालयको प्रमुखको जिम्मेवारी सहायक रथी राजाराम बस्नेतले पाएका छन्।
बिहीबार जिम्मेवारी हस्तान्तरणपछि नवनियुक्त बस्नेतले सैनिक नागरिक सम्बन्ध बलियो बनाउने प्रतिबद्धता व्यक्त गरे।

२२ जेठ, काठमाडौं । नेपाली सेनाका प्रवक्ता गौरवकुमार केसीको पूर्वी पृतना हेडक्वार्टरको निमित्त प्रमुखका रुपमा सरुवा भएको छ । उपरथी बढुवा हुने क्रममा रहेका सहायक रथी केसीलाई जंगीअड्डाले पूर्वी पृतनाको निमित्त प्रमुखको जिम्मेवारी दिएको हो ।

उनको सरुवापछि सैनिक सूचना तथा जनसम्पर्क निर्देशनालयको प्रमुखको जिम्मेवारी सहायक रथी राजाराम बस्नेतले पाएका छन् ।

उनी हाल राष्ट्रिय निकुञ्ज तथा वन्यजन्तु आरक्ष निर्देशनालयका समेत महानिर्देशक हुन् । पूर्वी पृतनाका निवर्तमान प्रमुख पवनराज घिमिरेले चाहिँ निराक्षणाधिकृतको जिम्मेवारी पाएका छन् ।

बिहीबार जिम्मेवारी हस्तान्तरणपछि भएको परिचयात्मक कार्यक्रममा नवनियुक्त सैनिक प्रवक्ता बस्नेतले आफूले सैनिक नागरिक सम्बन्धलाई बलियो बनाउन भूमिका खेल्ने बताए ।

निवर्तमान प्रमुख केसीले सैनिक सूचनालाई जनसमक्ष पुर्‍याउन भूमिका खेलेको भन्दै सञ्चारकर्मीहरूलाई धन्यवाद दिए ।