वैदेशिक रोजगारीबारेको फिल्म ‘रियाल रिङ्गेट’को प्रदर्शन मिति तय

News Summary

Generated by OK AI. Editorially reviewed.

फिल्म ‘रियाल रिङ्गेट’को प्रदर्शन मिति १६ साउन तय भएको छ।
निर्माता कम्पनी रेबेल फिल्म्सले पोस्टर सार्वजनिक गरी जानकारी दिएको हो।
फिल्मले नेपाली श्रमिकको सामाजिक प्रभावलाई कथावस्तु बनाएको छ।

काठमाडौं । वैदेशिक रोजगारीको सामाजिक प्रभावको कथावस्तुमा बनेको फिल्म ‘रियाल रिङ्गेट’को प्रदर्शन मिति तय भएको छ ।

निर्माता कम्पनी रेबेल फिल्म्सले शुक्रबार पोस्टर सार्वजनिक गर्दै १६ साउनदेखि प्रदर्शन हुने जनाएको हो । विभोर पोखरेलले निर्देशन गरेको फिल्मका लगानीकर्ता गगनलाल प्रधान हुन् ।

पटकथा प्रदीप भारद्वाजको छ । नेपाली श्रमिकको प्रमुख गन्तव्यस्थल कतार, साउदी अरब र मलेसियाको मुद्राको नामबाट फिल्मको शीर्षक राखिएको छ । पोस्टरको ट्यागलाइनमा लेखिएको छ, ‘जब त्रिभुवन विमानस्थलबाट जहाज उड्यो, जहाजसँगै सपना र जिन्दगी उड्यो ।’

फिल्ममा प्रमोद चौलागाईं, नीता ढुङ्गाना, छुल्ठिमडोल्मा गुरुङ, रवीन्द्र खड्का, ध्रुव कोइराला, प्रेम सुब्बा, रामचन्द्र अधिकारी, रियर राई, रोशन श्रेष्ठ, ईश्वरी बराल, बिमला गिरीको अभिनय छ ।

छायाङ्कन भारतको राजस्थान, नेपालका चितवन, काठमाडौं र लेटाङमा गरिएको छ । काफिया फिल्म्सले वितरण गर्दैछ ।