आधारभूत सेवामा पहुँच सुनिश्चित गर्न सरकार दृढ छ : मन्त्री यादव

News Summary

Generated by OK AI. Editorially reviewed.

खानेपानी मन्त्री प्रदीप यादवले स्वच्छ पानीको पहुँच सुनिश्चित गर्न सरकारको प्रतिबद्धता व्यक्त गरे।
उनले जतुवा खानेपानी आयोजना अब नियमित सेवा सञ्चालनमा प्रवेश गरेको बताए।
आयोजनाले दैनिक १७ लाख लिटर पानी उत्पादन गरी ६ हजार नागरिकलाई लाभ पुर्‍याउने लक्ष्य राखिएको छ।

२८ जेठ, विराटनगर । खानेपानी मन्त्री प्रदीप यादवले सरकार जनताको आधारभूत सेवामा पहुँच सुनिश्चित गर्न दृढ रहेको बताएका छन् ।

विराटनगर महानगरपालिका–१४ स्थित जतुवा खानेपानी तथा सरसफाइ आयोजना, नेपाल खानेपानी संस्थान, विराटनगर शाखालाई हस्तान्तरण कार्यक्रममा बोल्दै मन्त्री यादवले स्वच्छ खानेपानी हरेक नागरिकसम्म पुर्‍याउनु सरकारको दायित्व भएको बताए ।

‘जनताको जीवनस्तर उकास्न स्वच्छ र सुरक्षित पानीको पहुँच अनिवार्य शर्त हो,मन्त्रालय यस आयोजनाको सफल कार्यान्वयनमा आवश्यक नीति, स्रोत र सहकार्य उपलब्ध गराउन कटिबद्ध छ’, उनले भने । सरकार आफ्नो उद्देश्य र दायित्व पूरा गर्न प्रतिबद्ध रहेको उनको दाबी छ ।

झन्डै १८ वर्षदेखिको प्रतीक्षा सकिएको बताउँदैै मन्त्री यादवले जतुवा आयोजना अब संस्थागत रूपमा नियमित सेवा सञ्चालनको चरणमा प्रवेश गरेको बताए ।

आयोजनामार्फत दैनिक १७ लाख लिटर पानी उत्पादन गरी कम्तिमा पनि ६ हजार नागरिकलाई प्रत्यक्ष लाभ पुर्‍याउने, र पाँच सय घरमा नयाँ धारा जडान गर्ने लक्ष्य लिइएको नेपाल खानेपानी संस्थानका महाप्रवन्धक अर्जुनबाबु ढकालले जानकारी दिए ।

आयोजनाले बिराटनगर–१४ सहित नजिकको नरही, वडा नं. ८, १० र १३ तथा आसपासका क्षेत्रका बासिन्दा पनि लाभान्वित हुने संस्थानले जनाएको छ ।