बनेको १७ वर्षपछि खानेपानी ट्यांकीको उद्घाटन, अझै प्रयोगविहीन

News Summary

Generated by OK AI. Editorially reviewed.

विराटनगरमा १७ वर्षअघि निर्माण भएको खानेपानी ट्यांकीको उद्घाटन आज भएको छ।
ट्यांकी प्रयोगमा नआएको र संरचना कमजोर भएको स्थानीयले बताए।

२८ जेठ, विराटनगर । विराटनगरमा १७ वर्षअघि निर्माण भएको खानेपानी ट्यांकीको बल्ल आज उद्घाटन भएको छ । तर अझै पनि प्रयोगमा भने आएको छैन ।

विराटनगर महानगरपालिका-१४ जतुवामा २०६५ सालमा निर्माण भएको खानेपानी ट्यांकी आज खानेपानीमन्त्री प्रदीप यादवले उद्घाटन गरेका हुन् ।

जतुवामा रहेको लक्ष्मीनारायण मन्दिर परिसरमा २०६५ सालमा करिब साढे ४ करोड लागतमा निर्माण भएको ट्यांकी प्रयोगमा भने आएको थिएन ।

विराटनगर महानगरपालिका–१४ स्थित जतुवा खानेपानी तथा सरसफाइ आयोजना, नेपाल खानेपानी संस्थान, विराटनगर शाखालाई हस्तान्तरण कार्यक्रममा बोल्दै मन्त्री यादवले नागरिकलाई स्वच्छ खानेपानी वितरण गर्ने लक्ष्य रहेको बताए ।

स्वच्छ,सुरक्षित र प्रयाप्त पानी जनतालाई उपलब्ध गराउन एक घर, एक धारा पुर्‍याउने लक्ष्य रहेको उनको भनाइ छ ।

१७ वर्षअघि निर्माण भएर पनि प्रयोगमा नआएको ट्यांकीको संरचना कमजोर भइसकेको स्थानीय बताउँछन् ।

विराटनगर महानगरपालिका–८, १०, १३ र १४ मा खानेपानी पुर्‍याउने लक्ष्यसहित यो ट्यांकी निर्माण भएको थियो ।

पाइपलाइन करिब २७ किलोमिटर बिच्छ्याइएको थियो । तर खानेपानी वितरण भएन । सडक विस्तार र मर्मतका क्रममा पाइपलाइनमा क्षति पुगेको छ ।

संस्थानले पाइपलाइन मर्मत गरी आयोजना सञ्चालन गर्ने खानेपानी कार्यालय विराटनगरका प्रमुख सन्तोष रौनियारले जानकारी दिए ।

दैनिक १७ लाख लिटर पानी उत्पादन गरी छ हजार नागरिकलाई स्वच्छ खानेपानी उपलब्ध गराउने योजना संस्थानको छ ।