१५औं महाधिवेशनको मिति तोक्न नैनसिंह महरको माग

Photo Credit : महरको फेसबुक प्रोफाइलबाट

फाइल फोटो

News Summary

Generated by OK AI. Editorially reviewed.

नेपाली कांग्रेसका केन्द्रीय सदस्य नैनसिंह महरले महाधिवेशनको मिति तत्काल तोक्नुपर्ने माग गरेका छन्।
उनले महाधिवेशनको अनिश्चितताले पार्टीमा अन्योल र सांगठनिक गतिशीलता प्रभावित भएको बताए।
महरले सरकार निर्माणको समयमा भएको सहमतिको कार्यान्वयन र पार्टीको चरित्रमा पार्ने प्रभावबारे प्रश्न उठाए।

१६ असार, काठमाडौं । नेपाली कांग्रेसका केन्द्रीय सदस्य नैनसिंह महरले १५औं महाधिवेशनको मिति तत्काल तोक्नुपर्ने माग गरेका छन् ।

केन्द्रीय समितिको बैठकमा धारणा राख्ने क्रममा महरले कार्यकर्तामा रहेको भ्रम चिर्न नेतृत्वसँग महाधिवेशनको मिति तय गर्नुपर्ने बताए ।

महाधिवेशनको अनिश्चितताले पार्टी पंक्तिमा अन्योल बढाएको र सांगठनिक गतिशीलतामा असर परेको उनले सुनाए ।

‘महाधिवेशनबारे अनेक भ्रम छरिएका छन्, यसले पार्टी पंक्तिमा अन्योल बढाएको छ, विधान अनुसार समयमै तयारी गर्न र पार्टीलाई गतिशील बनाउन महाधिवेशनको कार्यतालिका सहित मिति घोषणा गर्न अब ढिलाइ गर्नु हुँदैन,’ बैठकमा उनले भने ।

महरले आगामी महाधिवेशनमा महामन्त्रीको उम्मेदवार हुने भन्दै प्रचार समेत सुरु गरिसकेका छन् ।

महरले भने,‘संयन्त्रलाई संविधानले चिन्दैन, पदाधिकारी बैठकको निर्णयलाई पार्टी विधानले चिन्दैन, सबै निर्णय केन्द्रीय समितिबाट हुनुपर्छ वा पदाधिकारी बैठक विधानत: व्यवस्था गरिनुपर्छ ।’

क्रियाशील सदस्यता वितरण र नविकरणलाई व्यवस्थित गर्दै अनलाइन प्रणालीमा लान उनले सुझाव दिए ।

भातृ संस्थाहरूको महाधिवेशन गर्नुपर्ने, विभागहरूलाई पूर्णता दिनुपर्ने र पार्टीको क्यालेन्डर कडाइका साथ कार्यान्वयन गर्नुपर्ने बैठकमा उनले सुनाए ।

महरले सरकार निर्माणको बेला भएको सात बुँदे सहमतिको कार्यान्वयन र त्यसले कांग्रेसको चरित्रमा पार्ने प्रभावबारे प्रश्न गरे ।

उनले भने, ‘सबैभन्दा ठूलो दल भएर पनि सरकारमा कांग्रेसको भूमिका खुम्च्याइएको छ र नेतृत्वकर्ताबाटै अवमूल्यन भएको छ।’