पार्टी बैठकमा गगन थापा : ०८३ मंसिर अघि नै महाधिवेशन हुन्छ

२३ असार, काठमाडौं । नेपाली कांग्रेसका महामन्त्री गगन थापाले २०८३ को मंसिरभन्दा पर लगेर १५औं महाधिवेशन हुन नसक्ने बताएका छन् ।

पार्टी केन्द्रीय समिति बैठकको अन्तिम दिन बोल्ने क्रममा महामन्त्री थापाले २०८३ भन्दा पछाडि लैजान नहुने बताए । त्यसपछि महाधिवेशन गर्न संवैधानिक र कानूनी आधार समेत नहुने उनले बताए । ‘त्यसैले ८३ मंसिरसम्म पनि नपुर्‍याइकन सकेसम्म छिटो हामीले गर्‍यौं भने स्थानीय निर्वाचनको तयारीका लागि पार्टीले आन्तरिक काम गर्न पाउँछ ।’

पार्टीमा कोही महाधिवशेनको पक्षधर र कोही पक्षमा नभएको जस्तो गरी नेताहरूले प्रचार गर्ने गरेको भन्दै आपत्ति जनाए । ‘कोही महाधिवेशन गर्ने पक्षको, कोही महाधिवेशन नगर्ने पक्षको, कोही छिटो गर्ने, कोही ढिलो गर्ने, जुन कुरामा हामी कोही पनि छैनौं’, थापाले भने ।

विगतमा महाधिवेशन हुने कार्यतालिका निश्चित भएपछि क्रियाशीलको पोको खोल्ने गरिएको उल्लेख गर्दै यसपटक विधान अनुसार काम गरिएको उनले बताए ।

थापाले क्रियाशील सदस्यता नवीकरणको कार्य भइरहँदा नेताहरुले आफ्नो क्षेत्रको अवस्था के छ भनी ख्याल गर्न आग्रह गरे । थापाले आफ्नो क्षेत्र (काठमाडौं–४ ) ले नवीकरण गरेर केही महिना अघि नै सकेको उदाहरण प्रस्तुत गरे ।

‘पार्टीका नेताहरूलाई मैले अनुरोध गर्न खोजेको, कम्तीमा आफ्नो निर्वाचन क्षेत्रमा क्रियाशील सदस्यता रिन्यु नहुने कुराको सन्दर्भमा अलिकति बढी त्यहाँ काम गर्दिनुपर्नेछ,’ नेताहरूलाई थापाले आग्रह गरे ।

क्रियाशील सदस्यता व्यवस्थापन समितिका संयोजक समेत रहेका थापाले समुदाय, नवीकरणको अवस्था, मतदाता लगायत आधारमा नयाँ सदस्यताको जिल्लागत प्रतिशत तोकिने बताए । नवीकरण कति भयो र मतदाता, मतदान कति प्राप्त भयो त्यस आधारमा नयाँ सदस्यताको फारम जिल्लालाई दिने बताउँदै उनले भने, ‘उदाहरणका रूपमा सबभन्दा बढी रिन्यु भएको चितवन थियो । अब हामीले संघीय निर्वाचनको परिणामहरू राखेर पनि यसलाई यसरी हेर्न पनि सक्छौं ।’

महाधिवेशनबारे आफूलाई केही भन्न आवश्यक नभएको बताए ।

‘महाधिवेशनको बारेमा केही पनि भएको छैन भन्ने कुरा कृपया पार्टीका जिम्मेवार नेता साथीहरूले बाहिर नभन्दिनुहोला भन्ने मेरो अनुरोध छ’ उनले भने, ‘त्यो हो भनेदेखि ठ्याक्कै के भयो भने, महाधिवेशनको सुनिश्चितता भन्ने हो भनेदेखि पार्टीमा सभापतिलाई वा हामी कसैलाई पनि बोलाएर छलफल गर्ने कुराहरू गर्न आवश्यक छ ।’