‘भाइटीका’को शीर्ष भूमिकामा रेखा, विपिनकी बहिनीको रोलमा देखिने

News Summary

Generated by OK AI. Editorially reviewed.

अभिनेत्री रेखा थापा ‘भाइटीका’ फिल्मको शीर्ष भूमिकामा अनुबन्धित भएकी छन्।
फिल्मको कथा दाजुबहिनीको मर्मस्पर्शी कथामा आधारित छ र २०८२ मा छायांकन हुनेछ।
निर्देशक दीपक वली र पटकथा महेश दवाडीले तयार पार्ने यो फिल्म २०८३ को तिहारमा प्रदर्शन हुने अपेक्षा छ।

काठमाडौं । रोहित अधिकारीको आगामी फिल्म ‘भाइटीका’को शीर्ष भूमिकामा अभिनेत्री रेखा थापा अनुबन्धित भएकी छन् । निकट स्रोतका अनुसार निर्माता र रेखाबीच बुधबार लिखित सम्झौता भएको छ ।

यसअघि यो फिल्मको शीर्षमध्येको भूमिकामा अभिनेता विपिन कार्की पनि अनुबन्धित भैसकेका छन् । दाजुबहिनीको मर्मस्पर्शी कथावस्तुमा निर्माण हुन लागेको यो फिल्ममा रेखाले विपिनकी बहिनीको भूमिकामा अभिनय गर्ने जनाइएको छ ।

रेखा पछिल्लोपटक लिड रोलमा आफ्नो होमप्रोडक्सन फिल्म ‘उपहार’मा देखिएकी थिइन् भने यसैमहिनाको उनको शीर्ष अभिनय रहेको नाटक ‘मीरा’ मञ्चन भैसकेको छ ।

फिल्म ‘भाइटीका’मा रेखाले विपिनकी बहिनीको भूमिकामा अभिनय गर्ने भएपछि यो चरित्रमा रुपान्तरणका लागि उनले आफूलाई सोहीअनुसार तयार गर्नुपर्ने हुन्छ । २० वर्षदेखि दाजु र बहिनीले तिहारमा भाइटीका लगाउन नपाउँदाको मर्मस्पर्शी कथामा फिल्म बन्नेछ ।

दीपक वलीले निर्देशन गर्ने यो फिल्मको पटकथा महेश दवाडीको हुनेछ । २०८२ सालमा छायांकन हुने फिल्मको प्रदर्शन २०८३ सालको तिहार छेकोमा हुने अपेक्षा छ ।

निर्माता अधिकारीको पछिल्लो फिल्म ‘माइतीघर’ दशैंको फूलपातीमा प्रदर्शन तयारीमा छ ।