२०८२ असार २७ गते १७:११ 
News Summary
Generated by OK AI. Editorially reviewed.- सुदूरपश्चिम रोयल्सले मलेसियामा सम्पन्न एसीसी यू–१६ इस्ट जोन कप विजेता नेपाली क्रिकेटर सुशील रावललाई एक लाख रुपैयाँ आर्थिक सहयोग गरेको छ।
- रावलले सामाजिक सञ्जालमार्फत यू–१९ टोलीको प्रशिक्षण खर्चका लागि सहयोग मागेपछि सुदूरपश्चिम रोयल्सका सिइओ प्रकाश खड्काले आर्थिक सहयोग हस्तान्तरण गरेका हुन्।
- नेपाल क्रिकेट संघले विजयी टोलीका खेलाडीलाई जनही ५० हजार रुपैयाँ पुरस्कार दिने घोषणा गरेको छ र अन्यले पनि सहयोग सुरु गरेका छन्।
२७ असार, काठमाडौं । मलेसियामा सम्पन्न एसीसी यू–१६ इस्ट जोन कप विजेता नेपाली टोलीका सदस्य सुशील रावललाई फ्रेन्चाइज टिम सुदूरपश्चिम रोयल्सले एक लाख रुपैयाँ आर्थिक सहयोग गरेको छ।
‘ट्यालेन्ट हन्ट’ कार्यक्रमबाट टिममा आएका रावलले यू-१६ राष्ट्रिय टोलीमा स्थान बनाएका थिए । उनले प्रतियोगितामा ३ खेल खेल्दा ४ विकेट लिएका थिए ।
अब यू–१९ टोलीको छनोटका लागि भारतमा हुने प्रशिक्षणमा सहभागी हुनुपर्ने र करिब १ लाख रुपैयाँ खर्च लाग्ने भएपछि उनले सामाजिक सञ्जालमार्फत आर्थिक सहयोगको अपिल गरेका थिए।
त्यसैलाई सम्बोधन गर्दै सुदूरपश्चिम रोयल्सका सिइओ प्रकाश खड्काले शुक्रबार एक लाख रुपैयाँ हस्तान्तरण गरेका हुन्। ‘सपना देख्न नछाड सुशील। तिमीमा रहेको अनुशासन, प्रतिबद्धता र मेहेनतमा हामीलाई विश्वास छ’ रोयल्सले सामाजिक सञ्जालमा लेखेको छ, ‘यो त सुरूवात मात्र हो। तिमीले अझ धेरै अगाडि बढ्नेछौ। सुदूरपश्चिम रोयल्स् परिवार सधैं तिमी साथमा छ।’
रावल बझाङबाट छनोट भई राष्ट्रिय टोलीमा पुगेका हुन् र हाल कञ्चनपुरको शुक्लाफाँटा नगरपालिका–५ गर्जमुनीमा बसोबास गर्छन्।
विजयी टोलीका सबै खेलाडीलाई नेपाल क्रिकेट संघ (क्यान)ले जनही ५० हजार पुरस्कार दिने घोषणा गरिसकेको छ भने व्यक्तिगत रूपमा अन्य कतिपयले पनि सहयोग गर्न थालेका छन्।
प्रतिक्रिया 4