सुन्दरहरैँचाले भेट्यो एक दर्जन ढुकुर जोडी

२९ असार, मोरङ । मोरङको सुन्दरहरैँचा नगरपालिकाले ‘ढुकुर जोडी’ भन्दै १२ दम्पतीलाई सम्मान गरेको छ । हरेक वडाबाट १–१ गरी वर्षका उत्कृष्ट १२ दम्पती (ढुकुर जोडी)लाई आइतबार सम्मान गरेको हो ।

पालिकाले यसअघि प्रेमको प्रतीक मानिने ढुकुरको नाममा उत्कृष्ट जोडी खोज्न सार्वजनिक सूचना प्रकाशन गरेको थियो । आवेदन दिएका ४८ जोडीमध्ये हरेक वडाबाट १–१ जोडी गरी १२ जोडीलाई ढुकुर जोडी घोषणा गर्दै नगद १० हजार र प्रमाणपत्रसहित सम्मान गरेको हो ।

उनीहरूको विवरण एक वर्षसम्म वडा कार्यालयहरूमा राखिनेछ ।

नगरपालिकाले सुन्दरहरैँचा–१ बाट केशवप्रसाद काफ्ले र कञ्चन दाहाल, वडा नम्बर २ बाट सचिदानन्द साह र संगीताकुमारी गुप्ता, ३ बाट ध्रुव निरौला र अनु दाहाल, ४ बाट डिल्लीप्रसाद सिग्देल र अप्सरा सिग्देल र ५ बाट वीरेन्द्रकुमार कट्टेल र सीतादेवी कट्टेल, सुन्दरहरैँचा–६ बाट बालकृष्ण घिमिरे र सकुन्तला गौतम घिमिरे, ७ बाट बलिराम चौधरी र फुलोदेवी चौधरीलाई ढुकुर जोडी घोषणा गर्‍यो ।

सुन्दरहरैँचा– ८ बाट खगेन्द्र न्यौपाने र सम्झना न्यौपाने, ९ बाट योगराज कार्की र हिमकुमारी कार्की, १० बाट बौद्वबहादुर दाहाल र कल्याणी खड्का दाहाल, ११ बाट वेदकुमार खवास र केसवती खवास तथा १२ बाट अम्बरबहादुर मगर र ताराकुमारी मगर दम्पतीलाई उत्कृष्ट जोडी घोषणा गर्दै सम्मान गरेको हो ।

उत्कृष्ट जोडी खोज्न नगरपालिकाले १२ वटा मापदण्ड बनाएको थियो ।