पहिरोले बीपी राजमार्ग पुनः अवरुद्ध

फाइल फोटो

२९ असार, काभ्रेपलाञ्चोक । बीपी राजमार्गको रोशी क्षेत्रमा पानी पर्ने वित्तिकै सडक अवरुद्ध भइरहेको छ ।

काभ्रेको रोशी गाउँपालिका-९ पिन्थली र मंगलटार बिरुवाडाँडा र ९ र ११ को सीमाना कालढुङ्गास्थित खहरे खोलाको लेदो खस्दा सडक दुईतर्फी नै पूर्ण अवरुद्ध भएको इलाका प्रहरी कार्यालय मंगलटारका प्रमुख प्रहरी निरीक्षक इश्वर कार्कीले जानकारी दिए ।

आइतबार साँझ करिब ६ः३० बजे खोलाबाट आएको लेदोले सडक अवरुद्ध भएको उनको भनाइ छ ।

लेदोको मात्रा धेरै भएकाले सडक खुलाउन समय लाग्न सक्ने जिल्ला ट्राफिक कार्यालय काभ्रेले जनाएको छ । सडक अवरुद्ध भएकोले यात्रुहरूलाई वैकल्पिक मार्ग प्रयोग गर्न आग्रह गरिएको छ ।

अहिले धुलिखेलबाट पूर्व गइरहेको सवारीलाई काभ्रेभञ्ज्याङ र भकुण्डे तथा सिन्धुलीबाट काठमाण्डौ आउने सवारी सिन्धुलीमै रोकिएको जिल्ला प्रहरी कार्यालय सिन्धुलीले सूचना जारी गरेर जानकारी दिएको छ ।

बीपी राजमार्गकै पिन्थलीमा यसअघि पनि पहिरोका कारण सडक अवरुद्ध हुँदै आएको छ । गत असार १६ गते, असार २५ र २६ गते पनि पिन्थलीमा सडक अवरुद्ध भएको थियो भने असार २५ गते मंगलटारको बिरुवाडाँडामा सडक अवरुद्ध भएको थियो ।

लगातार पहिरो र लेदो खस्ने समस्या देखिन थालेपछि सम्बन्धित निकायहरुलाई समयमै पूर्वतयारी गर्न प्रहरीले अनुरोध गरेको छ