‘अड लट’ कारोबार आदेश मार्केट डेप्थमा देखिन थाल्यो

News Summary

Generated by OK AI. Editorially reviewed.

नयाँ आर्थिक वर्षको पहिलो दिनदेखि नेप्सेले मार्केट डेप्थमा अंकित मूल्य १ सय भएका कम्पनीका लागि १ देखि ९ कित्तासम्मको अड लट कारोबारको आदेश देखिने बनाएको छ।
नेप्सेका प्रवक्ता मुराहरि पराजुलीले भने, “पहिले पनि अड लट सेयर कारोबार गर्न नमिलेको होइन, तर पहिले मार्केट डेप्थमा देखिँदैनथ्यो, अहिले देखिने भएपछि कारोबारमा सहज हुनेछ।”
धितोपत्र कारोबार विनियमावली २०७५ अनुसार अंकित मूल्य १ सय भएमा १० कित्ता भन्दा कमको कारोबारलाई अड लट भनिन्छ।

१ साउन, काठमाडौं । नयाँ आर्थिक वर्षको पहिलो दिन बिहीबारदेखि सेयर बजारमा ‘अड लट’ कारोबार सहज बनेको छ ।

बिहीबारदेखि नै नेप्सेले मार्केट डेप्थमा ‘अड लट’ कारोबारको आदेश देखिने बनाएको छ । अंकित मूल्य १ सय भएका कम्पनीको हकमा १ देखि ९ कित्तासम्मको सेयर आदेश देखिने भएको छ । योसँगै अब १ देखि ९ कित्तासम्मको सेयर किनबेच सजिलो हुनेछ ।

‘पहिले पनि अड लट सेयर कारोबार गर्न नमिलेको होइन, तर पहिले मार्केट डेप्थमा देखिँदैनथ्यो, अहिले देखिने भएपछि कारोबारमा सहज हुनेछ’ नेप्सेका प्रवक्ता मुराहरि पराजुलीले भने ।

धितोपत्र कारोबार विनियमावली २०७५ मा ‘अड लट’ कारोबार सम्बन्धी व्यवस्था छ । यसअनुसार अंकित मूल्य १० भएमा १०० कित्ता, अंकित मूल्य १०० भएमा १० कित्ता र अंकित मूल्य १ हजार भएमा १ कित्तासम्मको कारोबारलाई अड लट भन्ने गरिन्छ ।

प्रायः सेयरमा अंकित मूल्य १ सय हुने गरेकाले तिनका हकमा १० कित्ताभन्दा कमको संख्यालाई ‘अड लट’ भन्ने गरिन्छ ।

‘अड लट’ कारोबारले सो कम्पनीको मूल्य परिवर्तन, समूहको सूचक तथा नेप्सेमा भने कुनै प्रभाव नपर्ने पराजुलीले बताए ।

अब नेप्सेको वेबसाइटमा रहेको मार्केट डेप्थमा गई ‘अड लट’को आदेश हेरेर आफ्नो टीएमएसमार्फत ‘अड लट’को संख्या तथा मूल्य म्याच गराइ कारोबार गर्न सकिनेछ ।