सांसद ज्वालाको प्रस्ताव : चक्रपथ विस्तारको काम सधैँ रोक्ने हो भने विकल्प खोजौं

News Summary

Generated by OK AI. Editorially reviewed.

नेकपा एकीकृत समाजवादीका सांसद प्रकाश ज्वालाले कलंकी–नारायणगोपाल चोक–कोटेश्वर चक्रपथ विस्तारको काम छिटो अगाडि नबढे विकल्प खोज्नुपर्ने प्रस्ताव राखेका छन्।
सांसद ज्वालाले चिनियाँ कम्पनीले निर्माण गर्न लागेको चक्रपथ विस्तारको काम सँधै \'होल्ड\'मा राख्ने हो भने विकल्प खोज्नुपर्ने बताए।
उनले राजधानीको सडकको बेहाल हुनु लाजमर्दो भएको र छिटो काम शुरु हुनुपर्ने स्पष्ट पारे।

२ साउन, काठमाडौं । नेकपा एकीकृत समाजवादीका सांसद प्रकाश ज्वालाले कलंकी–नारायणगोपाल चोक–कोटेश्वर चक्रपथ विस्तारको काम छिटो अगाडि बढाउन नसक्ने विकल्प खोज्नुपर्ने प्रस्ताव राखेका छन् ।

शुक्रबार सिंहदरबारमा बसेको संसदको पूर्वाधार विकास समितिको बैठकमा सांसद ज्वालाले चिनियाँ कम्पनीले निर्माण गर्न लागेको चक्रपथ विस्तारको काम सँधै ‘होल्ड’ मा राख्ने हो भने विकल्प खोज्नुपर्ने बताए ।

सांसद ज्वालाले सर्वसाधारणलाई प्राविधिक कुरा वा सरकारी प्रक्रियासँग सरोकार नभएको भन्दै सबैले छिटो परिणाम खोजेको स्पष्ट पारे ।

‘तुरुन्तै अगाडि बढ्छ भन्ने वचन सँधै आइरहने तर ठोस रुपमा अगाडि नबढ्ने, यो समस्या हामीले पहिल्येदेखि भोग्दै आएको हो’ उनले भने, ‘खासै काम अगाडि बढेको देखिँदैन । प्रक्रियागत झमेला, ढिलाई, यो असाध्यै झन्झटिलो देखिन्छ ।’

काम शुरु हुने हो भने कहिलेदेखि हुने र नहुने भए विकल्पका लागि तयार रहन पनि उनले आग्रह गरे ।

उनले भने, ‘यसको डिटेल, प्रक्रिया बताए पनि मूल सरोकार यसको ढिलाई किन भयो, छिटो काम शुरु हुनुपर्‍यो भन्ने हो । टेक्निकल कुरामा जानु परेन । छिटो काम शुरु हुनुपर्‍यो । अब नहुने हो भने विकल्प खोज्नुपर्‍यो । होल्डमा मात्रै राख्न भएन ।’

सांसद ज्वालाले राजधानीकै सडकको बेहाल हुनु लाजमर्दो कुरा भएको बताए । उनले दुर्गमतिर, कर्णाली वा सुदूरपश्चिमतिर झन् कस्तो अवस्था होला भन्दै प्रश्न गरे ।