‘सैयारा’ले भारतमा २० करोड ओपनिङ गर्ने प्रक्षेपण, स्टारका फिल्मलाई चुनौती

News Summary

Generated by OK AI. Editorially reviewed.

मोहित सुरीको निर्देशनमा बनेको फिल्म 'सैयारा' शुक्रबारदेखि प्रदर्शनमा आएको छ।
फिल्मले पहिलो दिन भारतमा हिन्दी संस्करणमा मात्र २० करोडको आक्रामक ओपनिङ गर्ने देखिएको छ।
यशराज प्रोडक्सनले निर्माण गरेको यो फिल्मले बिहिबार रातीसम्म १.९५ लाख एड्भान्स टिकट बिक्री गरेको छ।

मुम्बई । ‘आशिकी २’ फेम्ड बलिउड निर्देशक मोहित सुरीको नयाँ फिल्म ‘सैयारा’ शुक्रबारदेखि प्रदर्शनमा आएको छ । नवोदित कलाकार अहान पाण्डे र अनिता पद्डालाई शीर्ष भूमिकामा लिएर बनाइएको यो म्युजिकल रोमान्टिक ड्रामाको चर्चा यतिबेला खुबै छ ।

रिलिजअघि नै एड्भान्स टिकट बिक्रीमा उछाल ल्याएको यो फिल्मले पहिलो दिन नै आक्रामक ओपनिङ गर्ने प्रक्षेपण छ । डेब्यु कलाकारलाई लिएर मोहित सुरीले निर्देशन गरेको यो फिल्मले अन्य स्टारका फिल्मको ओपनिङलाई पनि पछाडि पार्ने देखिएको छ ।

एड्भान्स बुकिङ र ट्रेन्डलाई हेर्दा यो फिल्मले पहिलो दिन भारतमा हिन्दी संस्करणमा मात्र २० करोडको ओपनिङ गर्नसक्ने जनाइएको छ । यो संख्यामा अझै बढोत्तरी हुनसक्ने अनुमान पिंकभिल्लाले गरेको छ ।

प्रसिद्ध फिल्म ब्यानर यशराज प्रोडक्सनले निर्माण गरेको यो म्युजिकल रोमान्टिक फिल्मको चर्चा सुरुदेखि नै छ । ‘आशिकी’ फ्रेन्चाइजको लाभ पनि यो फिल्मले उठाउन सक्ने जनाइएको छ ।

विहिबार रातीसम्म फिल्मले १.९५ लाख एड्भान्स टिकट बिक्री गरेको जनाइएको छ । पीभीआर, आइनक्स र सिनेपोलिस चेनमा फिल्मले उक्त परिमाणमा अग्रिम टिकट बिक्री गरेको हो ।

‘सैयारा’ले सिकन्दर, रेड २, हाउसफुल ५ र सितारे जमीन पर जस्ता चलचित्रको प्रि-सेललाई उछिनेको छ । यसले ‘छावा’पछि सन् २०२५ को दोस्रो ठूलो अग्रिम बुकिङको स्थान हासिल गर्‍यो । यसअघि ‘छावा’ले प्रि-सेल्समा २ लाख २३ हजार टिकट बेचेको थियो ।