नागरिक एपमा जोडियो श्रम संसार पोर्टल 

१२ साउन, काठमाडौं । सरकारले रोजगारदाता र रोजगारी खोजिरहेकाहरुलाई जोड्न तयार पारेको श्रम संसार पोर्टल नागरिक एपमा जोडिएको छ ।  श्रम, रोजगार तथा सामाजिक सुरक्षा मन्त्रालय अन्तर्गतको श्रम संसार अनलाइन पोर्टल नागरिक एपमा जोडिएको हो ।

मन्त्री शरतसिंह भण्डारी र योजना आयोगका सदस्य डाक्टर प्रकाश कुमार श्रेष्ठले संयुक्तरूपमा उद्घाटन गरेका छन् । श्रमसंसार पोर्टल, नागरिक एपसँग जोडिएसँगै एकीकृत रूपमा विभिन्न सेवा प्रदान गर्ने श्रम मन्त्रालयले जनाएको छ ।

यो एकीकरणसँगै अब नागरिकहरूले आफ्नो मोबाइलमा रहेको नागरिक एपमार्फत नै रोजगारीका अवसरहरू खोज्न र सीधै आवेदन दिन सक्ने भएका छन् ।

उद्घाटन कार्यक्रमलाई सम्बोधन गर्दै मन्त्री भण्डारीले सरकारको ‘डिजिटल नेपाल’ फ्रेमवर्कलाई साकार पार्ने र नागरिकमैत्री शासन प्रवर्द्धन गर्ने दिशामा एक महत्वपूर्ण कोसेढुङ्गा भएको बताए ।

प्रविधिको प्रयोगमार्फत युवाहरूलाई रोजगारीसँग सहजै जोड्न सक्ने बताउँदै उनले यस सुविधाले रोजगारी खोज्ने प्रक्रियालाई सरल, पारदर्शी र झन्झटमुक्त बनाउने विश्वास व्यक्त गरे ।

राज्यले थुप्रै सेवा दिने गरेको तर, त्यो लक्षित समुदायमा पुग्न नसकेको बताए । त्यसका लागि नै डिजिटल नेपालको विकास भईरहेको बताए ।

यस नयाँ व्यवस्था अनुसार, नागरिकहरूले अब विभिन्न वेबसाइट चाहार्नुपर्ने वा रोजगारीको आवेदनका लागि कार्यालय धाउनुपर्ने बाध्यताबाट मुक्ति पाउनेछन् ।

नागरिक एपभित्रै श्रमसंसार पोर्टलमा पहुँच स्थापित भएपछि प्रयोगकर्ताले आफ्नो योग्यता अनुसारको रोजगारी खोज्ने र आवश्यक कागजातसहित सोही एपबाट आवेदन दिने सुविधा प्राप्त गर्नेछन् ।

यो सेवा प्रयोग गर्नका लागि नागरिकहरूले आफ्नो नागरिक एपलाई पछिल्लो संस्करण २.०.८३ भर्सनमा अद्यावधिक (अपडेट) गर्नुपर्नेछ ।

यो नयाँ संस्करण एन्ड्रोइड र आइओएस दुवै प्लेटफर्मका लागि उपलब्ध गराइएको छ । मन्त्रालयले सबै नागरिकलाई एप अद्यावधिक गरी नयाँ सुविधाको लाभ लिन अनुरोध गरेको छ।

यो पनि पढ्नुहोस

सरकारले सञ्चालनमा ल्यायो श्रम पोर्टल, कसरी गर्छ काम ?