रोजगारदाताले अब ‘श्रम संसार रोजगार पोर्टल’मा अनिवार्य रूपमा विज्ञापन राख्नुपर्ने

२० साउन, काठमाडौं। श्रम, रोजगार तथा सामाजिक सुरक्षा मन्त्रालय अन्तर्गतको श्रम तथा व्यवसायजन्य सुरक्षा विभागले श्रम इजाजत सम्बन्धी नयाँ व्यवस्था लागू गरेको छ । अबदेखि रोजगारदाताहरूले राष्ट्रियस्तरको दैनिक पत्रिकामा विज्ञापन प्रकाशन गर्दा सोही विज्ञापनलाई मन्त्रालयको ‘श्रम संसार रोजगार पोर्टल’ र ‘श्रम संसार एप’ मा पनि अनिवार्य रूपमा समावेश गर्नुपर्ने भएको छ ।

विभागले एक सूचना जारी गर्दै श्रम ऐन, २०७४ को दफा २२ को उपदफा (३) तथा श्रम नियमावली, २०७५ को नियम ७ बमोजिम यो नयाँ व्यवस्था गरिएको जानकारी दिएको हो । यो व्यवस्था नेपाल सरकारको ‘नागरिक एप’ सँग समेत आबद्ध गरिएको छ ।

विभागका निर्देशक मणिनाथ गोपका अनुसार रोजगारदाताले आफूलाई आवश्यक परेको दक्ष श्रमिकका लागि पहिले राष्ट्रियस्तरको दैनिक पत्रिकामा विज्ञापन प्रकाशन गर्नुपर्नेछ ।

यदि त्यसरी विज्ञापन गर्दापनि तोकिएबमोजिम नेपाली नागरिकबाट दरखास्त नआएमा वा योग्य उम्मेदवार छनोट हुन नसकेमा, त्यसको प्रमाणसहित मात्रै विदेशी श्रमिकलाई काममा लगाउन श्रम इजाजतका लागि विभागसमक्ष निवेदन दिन सकिनेछ ।

नेपाली नागरिकलाई रोजगारीमा प्राथमिकता दिने उद्देश्यले यो कदम चालिएको हो । साथै, श्रम नियमावली, २०७५ को नियम ७ को उपनियम (३) बमोजिमको विज्ञापनलाई मन्त्रालयको रोजगार पोर्टलमा समेत राख्नुपर्ने व्यवस्था गरिएकाले अब सबै रोजगारदाताले अनिवार्य रूपमा यो नियम पालना गर्नुपर्नेछ ।

हेर्नुहोस् वैदेशिक रोजगार :