एमालेमा ७० वर्षे उमेर हद र दुई कार्यकालको प्रावधानबारे बुद्धिजिवी परिषद्‌ले सर्वेक्षण गर्दै

नेपाल बुद्धिजिबी परिषदका अध्यक्ष गजेन्द्र थपलिया

News Summary

Generated by OK AI. Editorially reviewed.

नेपाल बुद्धिजिबी परिषद्ले नेकपा एमालेको दोस्रो विधान महाधिवेशनका लागि गुगल सर्वेक्षणमार्फत् संगठनात्मक संरचना र पार्टी कार्यक्रमसम्बन्धी अभिमत संकलन गरिरहेको छ।
परिषद्ले ७० वर्षे उमेर हद र दुई कार्यकालको व्यवस्था हटाउने वा नहटाउने विषयमा खुला सर्वेक्षण गरिरहेको छ र केन्द्रीय कमिटीले दुवै व्यवस्था हटाउने प्रस्ताव अनुमोदन गरेको छ।
परिषद्का अध्यक्ष गजेन्द्र थपलियाले भने, 'एमाले जनताको अभिमतबाटै यहाँसम्म आइपुगेको हो' र पार्टी कार्यकर्तासँगै जनताको अभिमत संकलन गर्ने तयारी भइरहेको छ।

२२ साउन, काठमाडौं । नेपाल बुद्धिजिबी परिषदले नेकपा एमालेको दोस्रो विधान महाधिवेशनमा प्रस्तुत गरिने विधानका अन्तर्वस्तुहरूमाथि गुगल सर्वेक्षण गरिरहेको छ ।

गुगल फारम मार्फत् सर्वेक्षण गरिरहेको हो । फारममा संगठनात्मक संरचनादेखि पार्टी कार्यक्रम जनताको बहुदलीय जनवाद (जबज) बारे समेत अभिमत लिन खोजिएको छ ।

७० वर्षे उमेर हद र दुई कार्यकालको व्यवस्था हटाउने वा नहटाउने विकल्पमा पनि सर्वेक्षण गरिएको छ । केन्द्रीय कमिटीले यो दुवै व्यवस्था हटाउने प्रस्ताव अनुमोदन गरेको छ ।

तर बुद्धिजिबी परिषद्ले यी प्रस्तावहरु खुला गरेर सर्वेक्षण गरिरहेको छ । आयोजक महाधिवेशनको स्वतः प्रतिनिधि हुने वा नहुने, ३३ प्रतिशत महिला पर्याप्त छ वा छैन, पदाधिकारी संख्या कति बनाउने जस्ता विषयमा पनि सर्वेक्षण गरिरहेको छ ।

परिषदका अध्यक्ष गजेन्द्र थपलिया नागरिकको अभिमत संकलन गर्नका निम्ति सर्वेक्षण विधि अपनाइएको बताउँछन् । ‘एमाले जनताको अभिमतबाटै यहाँसम्म आइपुगेको हो । जनताको अभिमत कस्तो छ भन्ने परीक्षण गरिरहनुपर्छ’ उनी भन्छन्, ‘पार्टीको विधान महाधिवेशन पनि हुँदै गरेकाले पार्टी कार्यकर्तासँगै जनतको अभिमत पनि संकलन गरेर बुझाउने तयारी गरेका हौं ।’