स्वस्तिक लघुवित्तको आईपीओ बाँडफाँट, ९९ प्रतिशतको हात रित्तो

News Summary

Generated by OK AI. Editorially reviewed.

स्वस्तिक लघुवित्तको प्राथमिक सेयर (आईपीओ) बिक्री प्रवन्धक नबिल इन्भेस्टमेन्ट बैंकिङले बाँडफाँट गरेको छ।
आईपीओमा २४ लाख ४० हजार ४६० जनाले आवेदन दिएका थिए, जसमा १९ हजार ५१९ जनाले सेयर पाएका छन्।
कम्पनीको प्रतिसेयर नेटवर्थ १९१ रुपैयाँ ४० पैसा र प्रतिसेयर आम्दानी ७ रुपैयाँ ३३ पैसा छ, कम्पनी ३ करोड १६ लाख सञ्चित नाफामा छ।

१२ भदौ, काठमाडौं । सर्वसाधारणलाई यसअघि खुलेको स्वस्तिक लघुवित्तको प्राथमिक सेयर (आईपीओ) बाँडफाँट भएको छ । बिक्री प्रवन्धक नबिल इन्भेस्टमेन्ट बैंकिङले आईपीओ बाँडफाँट गरेको हो ।

साउन ३० गतेदेखि सर्वसाधारणलाई कम्पनीको आईपीओ खुलेको थियो । आईपीओमा कुल २४ लाख ४० हजार ४६० जनाले आवेदन दिएका थिए ।

जसमध्ये २४ लाख ३६ हजार ३९३ आवेदन स्वीकृत भएका थिए । स्वीकृत आवेदनमध्ये जम्मा १९ हजार ५१९ जनाले सेयर पाएका छन् । सेयर पाएका १९ हजार ५१९ मध्ये ५ जनाले ११ कित्ता र बाँकीले १० कित्ताका दरले पाएका छन् ।

स्वीकृत आवेदनमध्ये ०.८० प्रतिशतले मात्रै सेयर पाएका हुन् । बाँकी ९९‍.२० को हात रित्तो भएको छ । आईपीओको नतिजा केही बेरपछि अनलाइन प्रणाली आईपीओ रिजल्ट डट् सीडीएससी डट् कम डट् एनपीमा हेर्न सकिनेछ ।

गत चैत मसान्तसम्म कम्पनीको प्रतिसेयर नेटवर्थ १९१ रुपैयाँ ४० पैसा छ भने प्रतिसेयर आम्दानी ७ रुपैयाँ ३३ पैसा छ । कम्पनी ३ करोड १६ लाख सञ्चित नाफामा छ । सिरहा जिल्लाको लाहानमा प्रमुख कार्यालय रहेको यो लघुवित्त प्रादेशिक स्तरको हो । इक्रा नेपालबाट कम्पनीले बी रेटिङ प्राप्त गरेको छ ।