आईएफआरसीले भन्यो- नेपाल रेडक्रस सोसाइटीको भविष्य जोखिममा परेको छ

१३ भदौ, काठमाडौं । रेडक्रसको अन्तर्राष्ट्रिय निकाय आईएफआरसीले नेपाल रेडक्रसको भविष्य जोखिममा परेको उल्लेख गरेको छ । आईएफआरसीको अनुपालन तथा मध्यस्थता समिति संयोजक क्रिस्टिना कुम्पुलाले नेपाल रेडक्रसलाई बिहीबार पत्र पठाएर चिन्ता व्यक्त गरेकी हुन् ।

आईएफआरसीको निलम्बनमा परेका पूर्व अध्यक्ष सुदर्शन नेपालले अदालतमा दायर गरेको रिटले निराश बनाएको कुम्पुलाले पत्रमा लेखेकी छन् । राजनीतिक दलको आधारमा तदर्थ समितिमा गरिएको भागवण्डाप्रति आपत्ति जनाउँदै पूर्व अध्यक्ष नेपालसहित चार व्यक्तिलाई आईएफआरसीले निलम्बन गरेको थियो ।

वर्तमान सरकारले विनोद शर्माको नेतृत्वमा ९ सदस्यीय तदर्थ समिति गठन गरेको थियो । त्यसविरुद्ध नेपाल पक्षधरले सर्वोच्च अदालतमा रिट दायर गरेको थियो । उक्त मुद्दा अझै विचाराधीन छ ।

‘विवादमा संलग्न पहिलेका समितिहरू मध्येको एक समितिका सदस्यले नयाँ तदर्थ समिति गठन गर्ने निर्णयलाई चुनौती दिँदै सर्वोच्च अदालतमा निवेदन दर्ता गराइएको छ भन्ने सुन्दा हामी धेरै निराश भएका छौँ,’ नेपाल रेडक्रसलाई पठाइएको पत्रमा भनिएको छ ।

यस परिस्थितिले नेपाल रेडक्रस सोसाइटीको प्रतिष्ठा तथा स्रोतहरूमा ठूलो क्षति पुग्न गएको उल्लेख गरिएको छ । सरकारको निर्णयका विरुद्ध अदालतमा रिट दर्ता गर्नु नेपाल रेडक्रस सोसाइटीको मानवीय लक्ष्यका विरुद्धको आघात भएको पक्रमा लेखिएको छ ।

राजनीतिक अथवा व्यक्तिगत स्वार्थभन्दा नेपाल रेडक्रसको भविष्यलाई ख्याल गरेर मुद्दा फिर्ता लिन आग्रह समेत गरिएको छ ।

हेर्नुहोस् विज्ञप्ति :