लोकगायक रत्न बेहोसीलाई नेपालरत्न सम्मान

काठमाडौं । लोकगायक रत्न (बेहोसी) बज्राचार्यलाई नेपालरत्न सम्मान प्रदान गरिएको छ । नेवाः साधना कला केन्द्रले बेहोसीलाई उनको ९० औं जन्मदिनको अवसरमा सम्मान गरेको हो ।

नेपाली र नेपालभाषाको गीतसंगीतमा उनको योगदानलाई उच्च मूल्याङ्कन गर्दै नेपालरत्न सम्मान दिइएको संस्थाका पौभाः सायिमले जनाए ।

ललितपुरको ज्यापु प्रज्ञा भवनमा सम्पन्न भएको नेपालरत्न सम्मान तथा रत्न बेहोसी एकल साँझ कार्यक्रममा सम्मान प्रदान गरिएको हो ।

यसअघि बेहोसीलाई ललितरत्न सम्मान र गणेशदेवी स्मृति पुरस्कार दिइएको थियो । उनले १२ वर्षको उमेरदेखि नाटक र संगीतको विधामा आफ्नो कला प्रस्तुत गर्दै आएका छन् ।

२०१० सालदेखि नेपाली र नेपालभाषाको गीतसंगीतको श्रीवृद्धि, विकास तथा समृद्धिको क्षेत्रमा बेहोसीले योगदान पुर्‍याउँदै आएका छन् ।

पहिलो पटक २०१३ सालमा रेडियो नेपालमा स्वर परीक्षण गराएका उनी१७ जना उम्मेदवारमध्ये एकल गायकको रुपमा रेडियो नेपालमा स्वर परीक्षणमा उत्तीर्ण भएका थिए ।

सोही दिन रेडियो नेपालमा प्रत्यक्ष प्रसारण मार्फत उनको गीत प्रशारण भएको थियो । त्यो बखत रेडियो नेपालबाट स्वर परीक्षण उत्तीर्ण गरेर प्रत्यक्ष प्रशारण मार्फत गीत गाउने नेपालकै थोरै मात्र गायक छन् ।

उनका समकक्षीको रुपमा स्वरसम्राट नारायणगोपाल गुरुवाचार्य, गोल्डेन भ्वाइस अफ नेपाल प्रेमध्वज प्रधान, गायक तथा वरिष्ठ संगीतकार नातीकाजी श्रेष्ठ, शिवशंकर मानन्धर, भक्तराज आचार्य थिए ।

नेपाली आधुनिक गीतसंगीतका उनीहरू दोस्रो पुस्ता हुन् । त्यसअघि मास्टर रत्नदास प्रकाश, हरिकृष्ण श्रेष्ठ, बच्चु कैलाश लगायतका संगीत साधक पहिलो पुस्ताका गायक हुन् ।

बेहोसीले नेपालभाषामा ५० र नेपाली भाषामा कम्तिमा १० वटा गीत गाइसकेका छन् । उनले गाएका र रचना गरेका दर्जनभन्दा बढी गीत अझै पनि क्यासेटमा सुरक्षित छन् ।