गुल्मीमा पहिरोले प्रमुख ३ सडक अवरुद्ध, आवतजावत ठप्प

१ असोज, गुल्मी । पहिरोका कारण जिल्लाका प्रमुख सडकहरू अवरुद्ध भएका छन् । प्रमुख सडक सञ्जाल प्रभावित हुँदा सर्वसाधारण आवत-जावतमा समस्या भएको छ ।

कालीगण्डकी करिडोरअन्तर्गत कालीगण्डकी-२ स्थित राक्सेमा ठूलो पहिरो खस्दा सडक पूर्ण रूपमा अवरुद्ध भएको जिल्ला प्रहरी कार्यालय गुल्मीका प्रहरी नायब उपरीक्षक (डीएसपी ) गंगाबहादुर सारुले बताए ।

त्यस्तै, मदन भण्डारी सडक मार्गअन्तर्गत रिडी-तम्घास सडकखण्ड रुरु-३ सल्लेरीमा पहिरो खस्दा आवतजावत ठप्प भएको छ ।

रुद्रवेणी–वामी सडकखण्डमा समेत समस्या देखिएको छ । सत्यवती गाउँपालिका वडानम्बर-४ भिर क्षेत्रमा खसेको पहिरोले बाटो अवरुद्ध बनेको प्रहरीले जनाएको छ । सोही सडकखण्डको डहरे खोलाको सडकसमेत बन्द भएको छ ।

डहरे खोलामा पानीको बहाब बढेकाले सवारीसाधन रोकिएका छन् । यो सडक भएर गुल्मी र छिमेकी जिल्ला बागलुङको बुर्तिबाङसम्म सवारीसाधन जाने गर्दछन् ।

ठाउँ-ठाउँमा पुल नहुँदा समस्या हुँदै आएको छ । सडक अवरुद्ध भएपछि अत्यावश्यक सवारीसाधन र सर्वसाधारण यात्रुहरू गन्तव्यमा पुग्न समस्या भएको छ ।

पहिरो हटाउने प्रयास गरिए पनि लगातार वर्षाले काममा कठिनाइ भइरहेको प्रहरीले जनाएको छ । जिल्लामा पछिल्लो तीन दिन यता निरन्तर वर्षा भइरहेको छ ।
वर्षाले जिल्लाका ग्रामीण क्षेत्रमा विद्युत सेवासमेत अनियमित हुने गरेको छ ।