कर्जा लगानी नकारात्मक, बैंक तथा वित्तीय संस्थाको नाफा ९ अर्ब

३ असोज, काठमाडौं । चालु आर्थिक वर्ष पहिलो महिना बैंक तथा वित्तीय संस्थाले ९ अर्ब रुपैयाँभन्दा धेरै नाफा गरेका छन् ।

निरन्तर घट्दो निक्षेपको ब्याजदरले बैंक/वित्तीय संस्थाले कर्जा लगानी बढाउन नसक्दा पनि ९ अर्ब नाफा गरेका हुन् ।

गत आवको निकै दबाबमा रहेका बैंक तथा वित्तीय संस्थाले कर्जा लगानी बढाउन भन्दा पनि पुरानो असुली गर्न केन्द्रित भएका थिए । त्यसले गर्दा पनि बैंक तथा वित्तीय संस्थाको खुद नाफामा केही कमी आएको देखिन्छ ।

त्यसैगरी गत आवसमेत अपेक्षित कर्जा विस्तार हुन नसकेको अवस्थामा चालु आव सुरुवातीमा त नकारात्मक नै रहेको अवस्था केन्द्रीय बैंकले सार्वजनिक नै गरेको अवस्था छ । कर्जा लगानीमा आएको संकुचनले नाफामा केही कमी आए पनि बैंक तथा वित्तीय संस्थाको कर्जा नोक्सानी, गैरबैकिङ सम्पत्ति लगायत सूचकमा भने ठूलो परिर्वतन आएको छैन ।

चालु आव साउनमा बैंक तथा वित्तीय संस्थाले ९ अर्ब ३७ करोड ५० लाख खुद नाफा गरेका छन् । यो नाफा गत आव सोही अवधिको तुलनामा थोरै हो । गत आव पहिलो महिना बैंक तथा वित्तीय संस्थाको कुल नाफा १० अर्ब १६ करोड रुपैयाँ रहेको नेपाल राष्ट्र बैंकले जनाएको छ ।

चालु आव बैंक तथा वित्तीय संस्थाले कुल ३२ वटा मात्रै कर्जा अपलेखन गरेका छन् । गत आव सोही अवधिमा यस्तो तथ्यांक ३ सय ३ हाराहारी रहेको केन्द्रीय बैंकले जनाएको छ ।

त्यसैगरी गत साउनमा बैंक तथा वित्तीय संस्थाको गैरबैंकिङ सम्पत्ति करिब १ करोडले मात्र थपिएको छ । गत आव सोही अवधिमा गैरबैंकिङ सम्पत्ति करिब डेढ अर्बले बढेको थियो । गत साउनसम्म गैरबैंकिङ सम्पत्ति ५० अर्ब ५६ करोड पुगेको छ ।

चालु आव पहिलो महिना बैंक तथा वित्तीय संस्थाको कर्जा नोक्सानी बापत् रकम पनि घटेको छ । उक्त अवधिमा बैंक तथा वित्तीय संस्थाले कुल ३३ करोड ७० लाख कर्जा नोक्सानी व्यवस्था गरेका छन् । गत आव सोही अवधिमा यस्तो रकम ४५ करोड रुपैयाँ थियो ।

गत साउनमा बैंकहरूको ब्याज खर्चमा केही कमी आएको छ । ब्याजदर घटेको अनुपातमा ब्याज आम्दानी समेत घटेको छ । तर, ब्याज खर्च तुलनात्मक कम छ ।

केन्द्रीय बैंकका अनुसार बैंक तथा वित्तीय संस्थाले साउनमा ४४ अर्ब ६० करोड रुपैयाँ ब्याज आम्दानी गरी २६ अर्ब ७७ करोड ब्याज खर्च गरेका छन् । चालु आव साउनमा बैंक तथा वित्तीय संस्थाले ६३ करोड रुपैयाँ जोखिम व्यवस्थाबाट फिर्ता पाएका छन् । कर्जा असुली वा अपलेखन भएपछि उक्त रकम फिर्ता भएको केन्द्रीय बैंकले जनाएको छ ।

केन्द्रीय बैंकका अनुसार साउनमा बैंक तथा वित्तीय संस्थाबाट निजी क्षेत्रमा प्रवाहित कर्जा २ अर्ब ९३ करोड (०.१ प्रतिशत) ले घटेको छ । साउनसम्म कर्जा लगानी ५४ खर्ब ९५ अर्ब रुपैयाँमा झरेको छ ।