चितवनमा सवारी दुर्घटनामा परेर दुई जना पत्रकार घाइते, एक जनाको अवस्था गम्भीर

७ असोज, काठमाडौं । चितवनमा मोटरसाइकल दुर्घटनामा परेर दुई जना पत्रकार घाइते भएका छन् ।

नारायणगढ–मुग्लिन सडकखण्डमा खसेको पहिरोको समाचार संकलन गर्न जाँदै गर्दा मंगलबार साँझ ६ बजेतिर मोटरसाइकल दुर्घटना हुँदा नेपाल टेलिभिजनका चितवन संवाददाता अनिल ढकाल र पत्रकार महासंघ चितवनका सदस्य सुदन पौडेल घाइते भएका हुन् ।

घाइतेमध्ये पत्रकार ढकालको अवस्था गम्भीर रहेको जिल्ला प्रहरी कार्यालय चितवनका सूचना अधिकारी एवं प्रहरी नायव उपरीक्षक (डीएसपी) रवीन्द्र खनालले अनलाइनखबरलाई जानकारी दिए ।

उनका अनुसार पत्रकार ढकालको टाउकोमा चोट लागेकाले भेन्टिलेटरमा राखेर उपचार भइरहेको छ ।

प्रेस युनियन चितवनका अध्यक्ष समेत रहेका पत्रकार ढकालको भरतपुरस्थित चितवन मेडिकल कलेज (सीएमसी) मा उपचार भइरहेको पत्रकार महासंघ चितवनका अध्यक्ष वसन्त पराजुलीले जानकारी दिए ।

उनका अनुसार ढकालसँगै मोटरसाइकलमा सवार रहेका पौडेलको अवस्था भने सामान्य छ ।

इच्छाकामना गाउँपालिका–५ स्थित तुइनखोलामा पहिरो खसेर राजमार्ग अवरुद्ध भएपछि उनीहरू भरतपुरबाट रिपोर्टिङका लागि त्यहाँ जाँदै थिए ।

‘पहिरोको समाचार संकलनका लागि जाँदै गर्दा भतेरी भन्ने स्थानमा माइक्रोलाई साइड दिन खोज्दा ट्रकसँग ठोक्किएको भन्ने सूचना छ,’ महासंघ चितवनका अध्यक्ष पराजुलीले भने ।