२०८२ असोज ८ गते २३:४७ 
News Summary
Generated by OK AI. Editorially reviewed.- भारतले एसिया कप क्रिकेट सुपर फोरमा बंगलादेशलाई ४१ रनले पराजित गर्दै फाइनलमा प्रवेश गरेको छ।
- भारतले दिएको १६९ रनको लक्ष्य पछ्याएको बंगलादेश १९ ओभर ३ बलमा १२७ रनमा अलआउट भयो।
- कुलदीप यादवले ४ ओभरमा १८ रन दिएर ३ विकेट लिए भने जसप्रित बुमराह र वरुण चक्रवर्तीले २-२ विकेट लिए।
८ असोज, काठमाडौं । भारत एसिया कप क्रिकेटको फाइनलमा प्रवेश गरेको छ । सुपर फोरअन्तर्गत बुधबार राति भएको खेलमा बंगलादेशलाई ४१ रनले पराजित गर्दै भारत एक खेल अगावै फाइनल पुगेको हो ।
भारतले दिएको १६९ रनको लक्ष्य पछ्याएको बंगलादेश १९ ओभर ३ बलमा १२७ रनमा अलआउट भयो । बंगलादेशका ओपनर सेफ हसनले सर्वाधिक ६९ रन बनाएपनि अन्यबाट उल्लेख्य योगदान हुन सकेन । पर्वेज हसन इमोनले २१ रन बनाए ।
भारतका कुलदीप यादवले ४ ओभरमा १८ रन दिएर ३ विकेट लिए । जसप्रित बुमराह र वरुण चक्रवर्तीले २-२ तथा अक्षर पटेलले १ विकेट लिए ।
त्यसअघि टस हारेर पहिले ब्याटिङको निम्तो पाएको भारतले २० ओभरमा ६ विकेट गुमाएर १६८ रन बनाएको थियो । ओपनर अभिषेक शर्माले ७५ रन बनाए । हार्दिक पान्ड्याले ३८ रन बनाए ।
बंगलादेशका रिशाद होसेनले २ विकेट लिँदा तन्जिम हसन साकिब, मुस्तफिजुर रहमान र मोहम्मद सैफुद्दिनले १-१ विकेट लिए ।
योसँगै सुपर फोरमा २ खेलमा ४ अंक जोडेको भारत फाइनलमा पुगेको छ । भारतले अब श्रीलंकासँग खेल्न बाँकी छ। श्रीलंका भने आजको नतिजासँगै बाहिरिएको छ ।
अब सुपर फोरमा बंगलादेश र पाकिस्तानबीचको खेलको विजेता फाइनलमा पुग्ने अर्को टोली बन्नेछ ।
प्रतिक्रिया 4