नेपाली राहदानी प्रयोग गरेर साउदी पुगे झन्डै २०० रोहिंग्या, सरकार बेखबर

९ असोज, काठमाडौं । झन्डै २०० जना म्यानमारका नागरिक नेपाली राहदानी प्रयाेग गरेर साउदी अरब पुगेको खुलेको छ ।

झन्डै २०० जना म्यानमारी राेहिंग्या समुदायका नागरिक नेपालको भूमि र राहदानी प्रयाेग गरेर साउदी अरब पुगेको खुलेको हो ।

असाेज ७ गते परराष्ट्रसचिव अमृतबहादुर राईको उपस्थितिमा विभिन्न ९ वटा देशमा राजदूत तथा नियाेगका अधिकारीसँगकाे भर्चुअल बैठकमा यो विषय उठेको थियो ।

उनीहरूकाे राहदानी र नागरिकतासहित अन्य कागजातबारे बुझ्ने काम भइरहेकाे जानकारी दूतावासका अधिकारीले गराएका थिए ।

उनीहरूले प्रयाेग गरिरहेका राहदानी धेरै पुरानाे रहेकाे साउदीस्थित नेपाली राजदूतावासका एक अधिकारीले जानकारी दिए । ती अधिकारीका अनुसार उनीहरूले प्रयाेग गरेको राहदानीको म्याद अहिले गुज्रिसकेको छ ।

साउदी अरबले भिसाकाे म्याद सकिएर पनि लामाे समयदेखि त्यहिँ बसिरहेकाहरूलाई नियन्त्रणमा लिने अभियान तीव्र पारेको छ । साेही क्रममा उनीहरूलाई नियन्त्रणमा लिएर साउदीको प्रशासनले नेपाली राजदूतावासलाई आफ्ना नागरिक लैजान भनेकाे थियाे ।

साउदी प्रशासनले आफ्ना नागरिकहरू फिर्ता लैजानुहाेस् भनेर दूतावासलाई पत्र पठाएको थियाे । त्यसपछि बुझ्दै जाँदा उनीहरू नेपाली नागरिक नै नरहेकाे पाइएकाे दूतावासका ती अधिकारीले बताए ।

उनीहरूसँग सन् २०१४ भन्दा अघिकाे नेपाली राहदानी देखिएकाे थियाे । उनीहरूमध्ये ९० प्रतिशतसँग हस्तलिखित राहदानी रहेकाे दूतावासका ती अधिकारीले बताए । तर, उनीहरू कुन मितिमा साउदी गएका थिए भन्ने खुलेको छैन ।

सरकारी संयन्त्रबाटै उनीहरूलाई राहदानी दिइयाे कि दलालहरूले नक्कली राहदानी बनाएर उनीहरूलाई साउदी पुर्‍याए भन्नेबारे दूतावास बेखबर छ ।

दूतावासका अनुसार पछिल्लो समय नेपाली राहदानी नै बाेकेर उनीहरू नविकरणका लागि समेत आएका थिए । तर, उनीहरू राम्रोसँग नेपाली समेत बाेल्न नसक्ने, नेपालका बारेमा केही थाहा नभएकाे, घर ठेगाना समेत थाहा नभएकाे पाइएकाे हाे ।