जेनजी प्रदर्शनमा चलेका गोली प्रहरीको कि बाहिरको भन्ने छानबिन हुनुपर्छ : बस्नेत

११ असोज, काठमाडौं । नेपाली कांग्रेसका नेता मोहन बहादुर बस्नेतले जेनजी आन्दोलनका क्रममा भएको दमनको छानबिन गरेर दोषीलाई कडा कारवाही गर्नुपर्ने बताएका छन् ।

कांग्रेस सिन्धुपाल्चोक जिल्ला क्षेत्र नंवर १ क्षेत्रिय कार्यसमितिले शनिबार बाह्रविसेमा आयोजना गरेको शुभकामना आदानप्रदान कार्यक्रममा नेता बस्नेतले जेनजी आन्दोलनका क्रममा प्रहरीले मात्रै नभए अन्यत्रबाट पनि गोली चलेको आशंका गर्दै छानबिन गरेर दोषीलाई कडा कारबाही गर्नुपर्ने बताए ।

‘नेपाल प्रहरीको बन्दुकको गोलीले मात्रै बच्चा मरेका छन् कि बाहिरबाट आएका बन्दुकको गोलीबाट पनि बच्चा मरेका छन् भन्ने यो सरकारले छानबिन गर्नुपर्छ । उचित ढंगले सजाय दिन सक्नुपर्छ,’ उनले भने ।

जेनजीको माग सकारात्मक रहेको भन्दै उहाले आन्दोलनका क्रममा बिभिन्न शक्तिले घुसपैठ गरेको हुनसक्ने उनले बताए ।  बस्नेतले आन्दोलनका क्रममा आफ्नो घर जलाएर कुनै फरक नपर्ने उल्लेख गर्दै अव हिजोको भन्दा पनि अझ प्रभावकारी र सक्रिय रुपमा आफ्नो कामलाई अघि बढाउने जिकिर गरे ।

‘हामीले देखेका छौं, संसद् भवन अघि मान्छे ढाल्दा एम्बुलेन्सबाट आएका मान्छेले पनि गोली सुट गरेको देखिएको छ,’ उनले भने ।

उहाले मुलुकको पछिल्लो अवस्थामा पनि कांग्रेसले उचित भूमिका निर्वाह गर्नुपर्नेमा जोड दिए ।