दशैंपछि सेयर किन्दा लाभांश पाइने यी १२ कम्पनी

२० असोज, काठमाडौं । दशैंपछि मंगलबारदेखि सेयर बजार खुल्दैछ । बजारमा सूचीकृत र नाफामा रहेका कम्पनीले लगानीकर्तालाई लाभांश पनि घोषणा गरिरहेका छन् ।

यसअघि घोषणा गरिसकेका तर बुक क्लोज हुन बाँकी कम्पनीको सेयर खरिद गर्दा अझै लाभांश पाइन्छ । बुक क्लोज हुनुभन्दा अघिल्लो दिनसम्म सेयर खरिद गर्दा लाभांश र साधारणसभामा सहभागी भइ आफ्नो अधिकार प्रयोग गर्न पाइन्छ ।

हालसम्म सूचीकृत १८ कम्पनीले लाभांश घोषणा गरेका छन् । तीमध्ये ५ को बुक क्लोज भइसकेको छ । अझै पनि १२ कम्पनीको सेयर किन्दा लाभांश पाइन्छ । एउटाको बुक क्लोज बाँकी रहे पनि लाभांश पाइँदैन । आर्थिक वर्ष सकिएको ६ महिनाभित्र साधारणसभा गरिसक्नु पर्ने व्यवस्था छ । यहीं व्यवस्थाका कारण कम्पनीहरुले पुस मसान्तभित्र साधारणसभा गरी लाभांश स्वीकृत गर्नेछन् ।

साधारणसभाबाट लाभांश स्वीकृत भएपछि लगानीकर्ताले नगद लाभांश बैंक खातामा र सेयर बोनस डिम्याट खातामा पाउँछन् । लाभांश घोषणा गरेका केही कम्पनीले साधारणसभा बोलाइसकेका छन् ।

४ वाणिज्य बैंकले लाभांश घोषणा गरेका छन् । जसमा एभरेस्ट, सिटिजन्स, सानिमा र माछापुच्छ्रे छन् । यीमध्ये माछापुच्छ्रेको बुक क्लोज भइसकेको छ । २ विकास बैंक मुक्तिनाथ र कामना सेवाले लाभांश घोषणा गरेका छन् । कामनाको बुक क्लोज भइसकेको छ ।

एउटा फाइनान्स कम्पनी मञ्जुश्रीले लाभांश घोषणा गरेको छ । २ माइक्रोफाइनान्स आरएसडीसी र गुराँसले लाभांश घोषणा गरेका छन् । ५ हाइड्रोपावर कम्पनी भगवती, अरुणभ्यली, युनिभर्सल, मिडसोलु र सिक्लेसले लाभांश घोषणा गरेका छन् । यीमध्ये युनिभर्सलको बुक क्लोज भइसकेको छ ।

२ उत्पादन तथा प्रशोधन कम्पनी युनिलिभर नेपाल र नेपाल ल्युब आयलले लाभांश घोषणा गरेका छन् । जसमध्ये नेपाल ल्युबको बुक क्लोज भइसकेको छ । त्यस्तै २ लगानी समूहका कम्पनी निफ्रा र हाथवेले लाभांश घोषणा गरेका छन् । हाथवेको बुक क्लोज भइसकेको छ ।

यी हुन् हालसम्म लाभांश घोषणा गरेका कम्पनी