आन्दोलनका नाममा देशविरुद्ध भयानक षड्यन्त्र गरियो : ओली

News Summary

Generated by OK AI. Editorially reviewed.

नेकपा एमालेका अध्यक्ष केपी शर्मा ओलीले जेनजी आन्दोलनका नाममा देशविरुद्ध भयानक षड्यन्त्र भइरहेको दाबी गरेका छन्।
ओलीले जेनजी आन्दोलन क्रममा आफ्नो घरमा आगजनी र तोडफोड भएको र सरकार उदासीन भएको आरोप लगाएका हुन्।
उनले गृहमन्त्रीले आफूमाथि व्यक्तिगत दुश्मनी लिएको र आफूविरुद्ध थप योजना बनाइरहेको गम्भीर आशंका रहेको बताए।

५ कात्तिक, काठमाडौं। नेकपा एमाले अध्यक्ष केपी शर्मा ओलीले आन्दोलनका नाममा गलत तत्वहरूले देशविरुद्ध भयानक षड्यन्त्र गरिरहेको दाबी गरेका छन् ।

जेनजी आन्दोलनमा आगजनी गरिएको बालकोटको घरको बुधबार अवलोकन गर्दै अध्यक्ष ओलीले यस्तो बताएका हुन् ।

जेनजी आन्दोलनकै कारण सरकार छाड्न बाध्य भएका निवर्तमान प्रधानमन्त्री ओलीले सरकारी, सार्वजनिक र व्यक्तिका घरमा आगजनी गर्नेहरू आपराधिक समूह नै भएको बताए ।

जेनजी आन्दोनलका क्रममा आफ्नो घरमाथि तोडफोड र आगजनीका साथै महत्त्वपूर्ण सामानहरु लुटिएको बताएका ओलीले उनीहरूलाई कारबाहीको दायरामा ल्याउन सरकार उदासीन देखिएको आरोप लगाए ।

वर्तमान सरकारले आफूविरुद्ध थप योजना बनाइरहेको उनको आशंका छ । गृहमन्त्रीले आफूमाथि व्यक्तिगत दुस्मनी लिएको भन्दै ओलीले आफूविरुद्ध थप योजना बनाइराखेको गम्भीर आशंका रहेको बताए ।

‘गृहमन्त्रीको हालैको अन्तर्वार्ता हेर्दा सरकारको उद्देश्य, गन्तव्य, छर्लङ्ग देखिएको छ,’ उनले भने, ‘नेकपा एमाले अचानक पलाएको सरकारको तमासासँग विचलित हुँदैन, एमालेले देशमा शान्ति, सुव्यवस्था, भ्रष्टाचार नियन्त्रण गरेर छाड्छ ।’