क्याम्ब्रेन पेट्रोलमा स्वर्ण पदक जित्ने सेनाको टोलीलाई ‘प्रधानसेनापति प्रशंसा निशान’ प्रदान

News Summary

Generated by OK AI. Editorially reviewed.

बेलायतमा सञ्चालन भएको ‘एक्सरसाइज क्यामब्रेन पेट्रोल २०२५’ मा नेपाली सेनाको टोलीले सर्वोत्कृष्ट अंकसहित स्वर्ण पदक जितेको छ।
प्रधानसेनापति अशोकराज सिग्देलले सैनिक मुख्यालयमा उक्त टोलीलाई प्रधानसेनापति प्रशंसा निशान प्रदान गरेका छन्।
यस अभ्यासमा ३३ राष्ट्रका ११७ टोली सहभागी थिए र नेपाली सेनाले सन् २०१७, २०१९ र २०२४ मा पनि स्वर्ण पदक जितिसकेको छ।

९ कात्तिक, काठमाडौं । बेलायतमा सञ्चालित ‘एक्सरसाइज क्यामब्रेन पेट्रोल २०२५’ मा स्वर्ण पदक जित्ने नेपाली सेनाको टोली सम्मानित भएको छ ।

सर्वोत्कृष्ट अंकसहित स्वर्ण पदक जित्ने टोलीलाई आज आइतबार सैनिक मुख्यालय जंगी अड्डामा आयोजित एक कार्यक्रमबीच प्रधानसेनापति अशोकराज सिग्देलले ‘प्रधानसेनापति प्रशंसा निशान’ प्रदान गरेका हुन् ।

उक्त अभ्यासमा सहभागी ९ प्रतियोगी र १ व्यवस्थापक गरी १० जनालाई सम्मान गरिएको हो ।

२३ असोजदेखि २५ असोजसम्म बेलायतको वेल्स ब्रेकनमा सञ्चालन भएको उक्त पेट्रोलमा सर्वोत्कृष्ट अंकसहित नेपाली सेनाले स्वर्ण पदक प्राप्त गरेको थियो ।

उक्त अभ्यासमा बेलायतसहित ३३ राष्ट्रका ११७ टोली सहभागी थिए । सन् १९६० देखि वार्षिक रूपमा सञ्चालन हुँदै आएको अन्तर्राष्ट्रिय स्तरको यो प्रतियोगितामा सन् २०१४ देखि नेपाली सेनाले भाग लिँदै आएको छ ।

दुई दिनभित्र हतियार र करिब ५० पाउन्ड बराबरको उपकरण तथा बन्दोबस्तीका समानसहित ५० किलोमिटर दूरी पार गर्नेपर्ने यो अभ्यासमा सहभागी हुने टोलीको विभिन्न तयारी, खबर संकलन, घाइते बिरामीको व्यवस्थापन लगायतका दक्षताहरू परीक्षण गरिन्छ ।

यसअघि नेपाली सेनाले सन् २०१७, २०१९ र २०२४ मा पनि स्वर्ण पदक प्राप्त गरेको थियो ।