सडक डिभिजन काठमाडौं मातहतका चार दर्जन ठेक्का तोड्ने प्रक्रियामा

News Summary

Generated by OK AI. Editorially reviewed.

सरकारले सडक डिभिजन काठमाडौं मातहतका ४८ ठेक्का तोड्ने प्रक्रिया थालेको छ।
सडक डिभिजनले निर्माण कम्पनीहरूलाई १५ दिनभित्र स्पष्टीकरण दिन सूचना जारी गरेको छ।
सडक डिभिजन भरतपुरले ५ निर्माण कम्पनीसँग खरीद सम्झौता तोड्ने प्रक्रिया सुरु गरेको छ।

११ कात्तिक, काठमाडौं । सरकारले सडक डिभिजन काठमाडौं मातहतका चार दर्जन ठेक्का तोड्ने प्रक्रिया थालेको छ ।

कार्यालयले मंगलबार निर्माण कम्पनीहरूका नाममा ‘ठेक्का किन नतोड्ने ?’ सम्बन्धी १५ दिने सूचना जारी गरेको हो । सो अवधि भित्र स्वयम् उपस्थित भई स्पष्टीकरण दिन भनिएको छ ।

त्यसो नगरे ठेक्का सम्झौताका शर्त र सार्वजनिक खरिद ऐन अनुसार ठेक्का अन्त्य गर्दै कारबाही गरिने समेत कार्यालयको सूचनामा उल्लेख छ । कुल ४८ वटा ठेक्कामा सडक निर्माण, मर्मतदेखि ट्राफिक सिग्नल मर्मत र सडकमा रंगरोगनको जिम्मा पाएका समेत रहेका छन् ।

उता, सडक डिभिजन भरतपुरले समेत ५ निर्माण कम्पनीसँग खरीद सम्झौता तोड्ने प्रक्रिया समेत सुरु गरेको छ । मंगलबार खरीद सम्झौता अन्त्य किन नगर्ने सम्बन्धी सूचना जारी गरी १५ दिन भित्र उपस्थित हुन भनिएको छ ।

पछिल्लो समय सरकारले पूर्वाधार निर्माणमा रुग्ण ठेक्का तोड्ने प्रक्रियालाई तीव्र बनाएको छ । जसमा सिँचाइ, सडक र झोलुङ्गे पुल निर्माणसँग सम्बन्धित धेरै छन् ।