नेपाल–थाइल्याण्ड सहकार्यमा वन्यजन्तु फोटोग्राफी कार्यक्रम हुने

काठमाडौं । गेहेन्द्र धिमाल फाउन्डेशन (जीडीएफ) र फोटो हस्टेल एन्ड फोटो क्याफेको सहकार्यमा ‘थ्रु द वाइल्ड लेन्स –फिल्ड–टेस्टेड लेन्सन्स फ्रम द हिमालयज’ कार्यक्रम हुने भएको छ । सो कार्यक्रम बैंककको तलाद नोईस्थित फोटो हस्टेल एन्ड फोटो क्याफेमा शनिबार दिउँसो ३ः३०मा हुने भएको हो ।

सो अन्तरक्रियात्मक सत्र नेपाल र थाइल्याण्डबीच दीर्घकालीन सहकार्यको सुरुवात हुने विश्वास लिइएको छ । फोटोग्राफर, संरक्षणकर्मी, विद्यार्थी र प्रकृतिप्रेमीहरूबीच अनुभव तथा ज्ञान आदानप्रदान गरी प्रकृतिसँग नैतिक संलग्नता प्रेरित गर्ने लक्ष्य राखिएको छ ।

कार्यक्रममा वन्यजन्तु फोटोग्राफर ओम प्रकाश यादवले नेपालका राष्ट्रिय निकुञ्ज र हिमालयी पारिस्थितिक प्रणालीमा दशकौँको अनुभवबाट विकसित फिल्ड–टेस्टेड विधिहरू साझा गर्नेछन्। सहभागीले प्राकृतिक प्रकाशको उपयोग, जनावरको व्यवहार पूर्वानुमान र संरक्षण–केन्द्रित वन्यजन्तु फोटोग्राफी सिक्नेछन् ।

निकोन स्कूल नेपालका प्रमाणित प्रशिक्षक ओम प्रकाश दक्षिण एसियाका सम्मानित वन्यजन्तु फोटोग्राफर हुन् । उनको कामले लोपोन्मुख प्रजाति र बासस्थान दस्तावेजीकरण गर्दै संरक्षण एजेन्सी, अनुसन्धान कार्यक्रम र शैक्षिक संस्थालाई सहयोग पुर्‍याउँदै आएको छ ।

कार्यक्रमबारे बोल्दै यादवले भने, ‘फोटोग्राफी मैले मैदानमा सिकेको कुरा साझा गर्ने र अरूलाई प्रकृतिप्रति सम्मानका साथ हेर्न सहयोग गर्ने माध्यम हो । यो कार्यक्रमसँगै सिक्ने, सिकाउने र जङ्गल जिउँदो राख्ने यात्राको निरन्तरता हो ।’

प्रस्तुति पछि थाइल्याण्ड र अन्तर्राष्ट्रिय फोटोग्राफर, सम्पादक, क्यामेरा ब्रान्ड प्रतिनिधि तथा संरक्षण आवाजहरूबीच नेटवर्किङ सत्र हुनेछ । फाउन्डेशनका अध्यक्ष गौतम धिमालले भने, ‘यो पहलले मानिसहरूले संसारलाई फरक ढङ्गले हेर्न र महसुस गर्ने चेतना सुरु हुन्छ भन्ने हाम्रो विश्वास छ ।’