१२४ विदेशी नागरिक डिपोर्ट, ट्रयाकिङ सिस्टम ल्याउने तयारी

News Summary

Generated by OK AI. Editorially reviewed.

अध्यागमन विभागले पछिल्लो तीन महिनामा अध्यागमन सम्बन्धी कसुर गरेको आरोपमा १२४ विदेशी नागरिकलाई डिपोर्ट गरेको छ।
महानिर्देशक रामचन्द्र तिवारीले विदेशी नागरिकलाई ट्रयाकिङ गर्ने नयाँ प्रणाली लागु गर्ने तयारी भइरहेको बताए।
विदेशी नागरिकको दर्ता तथा अनुगमन प्रणाली (एफएनआरटीएस) अन्तर्गत एयरलाइन्स र होटलहरूसँग समन्वय गरी जानकारी संकलन गरिनेछ।

१४ कात्तिक, काठमाडौं । अध्यागमन सम्बन्धी कसुर गरेको आरोपमा पछिल्लो तीन महिनामा १२४ विदेशी नागरिकलाई डिपोर्ट गरिएको छ ।

अध्यागमन विभागका महानिर्देशक रामचन्द्र तिवारीका अनुसार ओभर स्टेदेखि विभिन्न अध्यागमनसम्बन्धी अपराध गरेको आरोपमा १२४ विदेशी नागरिकलाई पछिल्लो तीन महिनामा डिपोर्ट गरिएको हो ।

विभिन्न भिसामा नेपाल आउने र यहाँ आएर अध्यागमन कानुन उल्लंघन गर्नेहरूमाथि कडाइका साथ कारबाही प्रक्रिया अघि बढाइएको उनले बताएका छन् ।

त्यसैगरी विदेशी नागरिकलाई ट्रयाकिङ गर्ने नयाँ सिस्टम ल्याउन लागिएको पनि अध्यागमन विभागले बताएका छ ।

नेपाल प्रवेश गरिसकेपछि ती नागरिकहरु कहाँ कुन अवस्थामा छन् भन्ने जानकारी नहुँदा उनीहरुकै सुरक्षामा समेत असर पर्ने गरेकाले ट्रयाकिङ सिस्टम ल्याउन लागिएको बताइएको छ ।

त्यसका लागि विदेशी नागरिक दर्ता तथा अनुगमन प्रणाली (एफएनआरटीएस) लागु गर्ने क्रममा रहेको महानिर्देशक तिवारीले बताए ।

यसका लागि उक्त सिस्टममा विदेशी नागरिक नेपाल आएपछि कहाँ–कहाँ जान्छन्, कहाँ बस्छन् भन्ने सामान्य सूचनाहरू रहने छन् ।

यसका लागि एयरलाइन्सदेखि होटलहरूसँग समेत समन्वय गरेर काम हुने विभागले जनाएको छ ।