पाँचतारे लुम्बिनी हेरिटेज अब क्राउन प्लाजा बन्ने

News Summary

Generated by OK AI. Editorially reviewed.

आईएचजी होटल्स एन्ड रिसोर्ट्सले लुम्बिनीमा आफ्नो प्रिमियम ब्रान्ड 'क्राउन प्लाजा' सञ्चालन गर्दै नेपालमा पुनः सेवा सुरु गर्ने भएको छ।
लुम्बिनी हेरिटेज होटललाई पुनः ब्रान्डिङ गरी 'क्राउन प्लाजा लुम्बिनी' नाम दिइने र यसमा १ सय ४७ कोठा, आधुनिक सुविधा र क्यासिनो सेवा रहनेछ।
आईएचजी र लुम्बिनी हेरिटेजबीच भारत नयाँदिल्लीमा सम्झौता भएको छ र सन् २०२६ भित्र आईपीओ निष्कासन गर्ने योजना रहेको छ।

१६ कात्तिक, काठमाडौं । अन्तर्राष्ट्रिय आतिथ्य समूह आईएचजी होटल्स एन्ड रिसोर्ट्सले नेपालमा पुन: सेवा सुरु गर्ने भएको छ ।

आईएचजी (इन्टरकन्टिनेन्टल होटल्स ग्रुप) ले पहिलो पटक काठमाडौं बाहिर सेवा विस्तार गर्दै लुम्बिनीमा आफ्नो प्रिमियम ब्रान्ड ‘क्राउन प्लाजा’ सञ्चालन गर्ने भएको हो ।

आईएचजीको क्राउन प्लाजा ब्रान्ड पहिले नेपालमा पाँचतारे होटल सोल्टी काठमाडौंमा सञ्चालित थियो । सोल्टीसँगको सम्झौता १४ मे २०२१ मा समाप्त भएपछि लुम्बिनी हेरिटेज मार्फत क्राउन प्लाजा पुन: नेपाल फर्किएको हो ।

हाल लुम्बिनीमा सञ्चालनमा रहेको लुम्बिनी हेरिटेज होटललाई पुन: ब्रान्डिङ गरी ‘क्राउन प्लाजा लुम्बिनी’ नाम दिइने भएको छ ।

यसबारे आईएचजी होटल्स एन्ड रिसोर्टस् र लुम्बिनी हेरिटेज लिमिटेडबीच सहकार्य गर्ने सम्बन्धमा सम्झौता भएको छ । भारत नयाँदिल्लीमा सम्झौता भएको हो ।

सम्झौतामा लुम्बिनी हेरिटेज लिमिटेडका अध्यक्ष सुभाष अमात्य र आईएचजी होटल्स एन्ड रिसोर्ट्सका दक्षिण पश्चिम एसिया प्रबन्ध निर्देशक सुदीप जैनले हस्ताक्षर गरेका छन् ।

यस सम्झौताले पर्यटन प्रवर्द्धन, रोजगारी सिर्जना र अन्तर्राष्ट्रिय लगानी आकर्षणमा महत्त्वपूर्ण योगदान गर्ने अपेक्षा गरिएको छ ।

यसअघि ‘पवन प्यालेस लुम्बिनी’ का नाममा सञ्चालनमा रहेको यो होटललाई अधिग्रहणपछि अन्तर्राष्ट्रिय मापदण्ड अनुसार पुन: रूपान्तरण गरिएको हो । होटलमा कुल १ सय ४७ कोठा छ । जसमा ७ स्विट रुमसहित, आधुनिक बहुउद्देश्यीय हल, रेस्टुरेन्ट, फिटनेस सेन्टर, स्विमिङ पुल र अन्य प्रिमियम सुविधा छन् । यसै वर्ष क्यासिनो सेवा सुरु गर्ने योजना रहेको समेत कम्पनीले जनाएको छ ।

लुम्बिनी हेरिटेज होटल बुद्ध जन्मस्थलबाट करिब १.९ किलोमिटर र गौतमबुद्ध अन्तर्राष्ट्रिय विमानस्थल भैरहवाबाट करिब ९ किलोमिटर दूरीमा छ । कम्पनीले सन् २०२६ भित्र सर्वसाधारणका लागि आईपीओ निष्कासन गर्ने योजना पनि अघि सारेको छ ।

लुम्बिनी हेरिटेज लिमिटेड अध्यक्षा अमात्यले आईएचजीसँगको सहकार्यले लुम्बिनीको आतिथ्य सेवा नयाँ स्तरमा पुग्ने र यस क्षेत्रको पर्यटन सम्भावनामा थप ऊर्जा भर्ने बताए ।

‘क्राउन प्लाजा लुम्बिनीसँगै नेपालमा हाम्रो उपस्थितिलाई पुन: सुदृढ गर्न पाउँदा खुसी छौं,’ आईएचजीका प्रबन्ध निर्देशक सुदीप जैनले भने, ‘आधुनिक डिजाइन र उत्कृष्ट सेवासहित यो होटल स्वदेशी तथा विदेशी पाहुनाका लागि उत्कृष्ट गन्तव्य बन्ने छ ।’