गुन्द्रुकको भाउ बढ्यो

News Summary

Generated by OK AI. Editorially reviewed.

कालीमाटी फलफूल तथा तरकारी बजार विकास समितिको तथ्यांक अनुसार मंगलबार गुन्द्रुकको औसत मूल्य प्रतिकिलो ३ सय १० रुपैयाँ पुगेको छ।
सोमबारको तुलनामा मंगलबार गुन्द्रुकको औसत मूल्य ३४ रुपैयाँले बढेको छ।
व्यवसायीले काभ्रे, धादिङ, नुवाकोट, इलाम, पोखरा लगायतका ठाउँबाट गुन्द्रुक ल्याएर कालीमाटी बजारमा बिक्री गर्ने बताएका छन्।

१८ कात्तिक, काठमाडौं । बजारमा गुन्द्रुकको भाउ बढेको छ । कालीमाटी फलफूल तथा तरकारी बजार विकास समितिको तथ्यांक अनुसार मंगलबार गुन्द्रुक प्रतिकिलो थोकमा न्यूनतम २ सय ५० देखि अधिकतम ३ सय ८० र औसत ३ सय १० रुपैयाँमा किनबेच भइरहेको छ ।

हिजो सोमबार भने गुन्द्रुक प्रतिकिलो न्यूनतम २ सय ५० देखि अधिकतम ३ सय र औसत २ सय ७६ रुपैयाँमा किनबेच भएको थियो । सोमबारको तुलनामा आज मंगलबार गुन्द्रुकको प्रतिकिलो औसत मूल्य ३४ रुपैयाँ बढेको हो ।

व्यवसायीका अनुसार कालीमाटी बजारमा पहाडी जिल्लाबाट बढी मात्रामा गुन्द्रुक आउने गर्छ । यहाँका व्यापारीले काभ्रे, धादिङ, नुवाकोट, इलाम, पोखरा लगायत ठाउँबाट ल्याएर गुन्द्रुक बेच्ने गरेका छन् ।

विगतमा खासै वास्ता नगरिने गुन्द्रुक अहिले साना पसलदेखि ठूला डिपार्टमेन्टल स्टोर र मार्टमा प्याकेजिङ र लेबल सहित बिक्री भइरहेका छन् । त्यसमाथि अनलाइन सपिङ प्ल्याटफर्ममा पनि दर्जनौं ‘भेराइटी’ का गुन्द्रुक अर्डर गर्न पाइन्छ ।